Ամենայն Հայոց Կաթողիկոսն ու Արամ Ա Կաթողիկոսը ցաւակցագիր յղած են Ղպտի եկեղեցւոյ Պատրիարքին։
16 փետրուարին Գարեգին Բ. Ամենայն Հայոց կաթողիկոսը եւ Մեծի Տանն Կիլիկիոյ Արամ Ա. Կաթողիկոս
ցաւակցական գիր յղած է Ղպտի ուղղափառ եկեղեցւոյ առաջնորդ Թաւատրոս Բ.ին` Լիպիոյ մէջ ահաբեկիչներու
կողմէ քսանմէկ ղպտիներու սպանութեան համար: Գերագոյն հոգեւոր խորհուրդի եւ Մայր Աթոռի
միաբանութեան անունով` Գարեգին Բ վշտակցութիւն յայտնած է ղպտիներուն, Եգիպտոսի ժողովուրդին
եւ սպաննուածներուն ընտանիքներուն: Դատապարտելով կատարուած ոճրագործութիւնը` Ամենայն
Հայոց հայրապետը կոչ ուղղած է միջազգային հանրութեան` առաւել ջանքեր գործադրելու Միջին
Արեւելքի մէջ արդարութեան եւ համերաշխութեան հաստատման համար, որպէսզի բացառուին բռնութիւնները
այն շրջաններուն մէջ, ուր քրիստոնեաներն ու իսլամները դարեր շարունակ կ՛ապրին խաղաղութեան
եւ ներդաշնակութեան մէջ: Իս կարգին Արամ Ա Կաթողիկոս ցաւակցական ու զօրակցութեան նամակներ
յղեց Եգիպտոսի նախագահ Ապտել Ֆաթթահ Սիսիին եւ Ղպտի եկեղեցւոյ հոգեւոր պետ Թաւատրոս Բ.
պատրիարքին: Վեհափառ հայրապետը ցաւակցութիւն յայտնելէ ետք Եգիպտոսի ժողովուրդին, յիշեցուց
ծայրայեղականութեան վտանգաւոր հետեւանքները` հաստատելով, որ անիկա շրջանին մէջ կը խաթարէ
քրիստոնեայ-իսլամ խաղաղ համագոյակցութիւնը: Թաւատրոս Բ. պատրիարքի ուղղած իր նամակին
մէջ Արամ Ա. կաթողիկոս իր վշտակցութիւնը յայտնեց ղպտի եկեղեցւոյ 21 անմեղ զաւակներուն
համար, զանոնք կոչելով 21-րդ դարու նահատակներ: Քրիստոնէական եկեղեցւոյ համար մարտիրոսները
յատուկ տեղ կը գրաւեն, 21 ղպտիները, որոնք արեան նահատակութեամբ մկրտուեցան, պէտք է ամրապնդեն
մեզ` մեր հաւատքին մէջ անսասան մնալու: