Այսօրուընէ (16 փետրուար 2015) կը սկսուի Մեծ Պահքի շրջանը: Ան կը տեւէ 48 օր` Բուն Բարեկենդանէն
մինչեւ Ս. Յարութեան (Զատկի) տօնի նախօրէն: Այս տարի Ս. Յարութեան տօնը պիտի նշուի Ապրիլ
5-ին: Պահքի շրջանին կ՛օգտագործին բացառապէս բուսական ծագում ունեցող սննդամթերք:
Պահքի ընթացքին կը հրաժարին ոչ միայն որոշակի կերակուրներէ, այլ նաեւ մոլի սովորութիւններէ,
շատախօսութենէ, ստախօսութենէ, հայհոյանքէ եւ այլ մեղքերէ: Կերակուրէն հրաժարիլը առանց
մեղքէն ետ կանգնելու` անօգուտ է: «Սատանան միշտ պահքի մէջ է, ոչինչ չ՛ուտեր, բայց մեղք
գործելէն չի դադարիր եւ չի յոգնիր», – կ՛ըսէ Ս. Գրիգոր Տաթեւացին: Պահքի 40 օրը կը
խորհրդանշէ անապատին մէջ Քրիստոսի քառասնօրեայ աղօթքի, ծոմապահութեան եւ ապաշխարութեան
շրջանը: Իր մկրտութենէն ետք Յիսուս «Հոգիով անապատ առաջնորդուեցաւ ու քառասուն օր փորձուեցաւ
սատանայէն: Չկերաւ ու չխմեց այն օրերուն» (Ղուկ. 4:1-3): Յիսուս Իրեն ծոմապահութեան ենթարկեց
մարդկային ցեղի փրկութեան համար, մարդկութեան փոխարէն Ինք ապաշխարեց, որպէսզի բոլոր պահեցողութիւն
ընողներուն ապաշխարանքը իմաստ եւ իրականութիւն ստանան շնորհիւ Իր ծոմապահութեան: Քառասնօրեայ
պահքին կը յաջորդէ պահքի եւս մէկշաբաթեայ շրջան` Աւագ շաբաթը: Այդ է պատճառը, որ քառասնօրեայ
կոչուող պահքը 48 օր կը տեւէ: Մեծ Պահքը այս տարի կը կիսուի Մարտ 11-ին եւ կը կոչուի
միջինք: Պահքը այդ օրը չեն ընդհատեր: Պարզապէս ժողովրդական սովորութեան համաձայն` այդ
օրր բաղարջէ պահքի գաթայ կը պատրաստեն: Մեծ Պահքի շրջանին վաղնջական կանոններով կ՛արգելուէին
պսակադրութիւնները եւ մատաղը: