Աշխարհի 31 երկիրներու բնակչութեան մեծամասնութիւնը 1915-ին Հայերուն նկատմամբ կատարուածը
որակած է Ցեղասպանութիւն։
«Արմէնփրես» կը հաղորդէ, որ «ֆաունտէյշընշոա» հիմնարկի կայքի եւ Քաղաքական նորարարութիւններու
միջազգային հիմնադրամի կատարած հարցախոյզը ցոյց տուած է, որ աշխարհի 31 երկիրներու բնակիչներուն
70 առ հարիւրէն աւելին, ներառեալ` Թուրքիոյ բնակչութեան 33 առ հարիւրը համաձայն է Հայոց
ցեղասպանութեան միջազգային ճանաչման: «Գալիք յիշողութիւնները» աշխատութեան մէջ հրապարակուած
տուեալներուն համաձայն, 31 երկրի բնակչութեան 70 առ հարիւրէն աւելին 1915-ին Երիտասարդ
թուրքերու կողմէ հայ ժողովուրդին դէմ կատարուածը որակած է ցեղասպանութիւն: Աշխատութեան
մէջ տպագրուած նիւթը եւ ուսումնասիրութիւնները կ՛առնչուին նախորդ դարուն տեղի ունեցած
տագնապներուն, ողբերգական դէպքերուն, ներառեալ` առաջին եւ երկրորդ համաշխարհային պատերազմներուն: Տարբեր
հարցերու շուրջ, ներառեալ` Հայոց ցեղասպանութեան վերաբերեալ հարցախոյզը կատարուած է Գերմանիոյ,
Աւստրալիոյ, Աւստրիոյ, Պելճիքայի, Քանատայի, Չինաստանի, Խրուաթիոյ, Դանիոյ, Սպանիոյ,
Էսթոնիոյ, Միացեալ Նահանգներու, Ֆինլանտայի, Ֆրանսայի, Յունաստանի, Հունգարիոյ, Հնդկաստանի,
Իսրայէլի, Իտալիոյ, Ճափոնի, Լաթվիոյ, Լիթուանիոյ, Հոլանտայի, Լեհաստանի, Չեխիոյ, Ռումանիոյ,
Բրիտանիոյ, Ռուսիոյ, Սերպիոյ, Զուիցերիոյ, Թուրքիոյ եւ Ուքրանիոյ մէջ: Հարցախոյզին
եւ ուսումնասիրութիւններուն մասնակցած են վերոնշեալ երկիրներէն 16-29 տարեկան երիտասարդներ: