Kurrë më homeli të mërzitshme: Kulti Hyjnor boton Drejtuesin
Me miratimin e Papës, Kongregata për Kultin Hyjnor dhe Disiplinën e Sakramenteve
hartoi “drejtuesin homelitik”. Nuk është udhëzim oratorie, as shfaqjeje, e aq më
pak qortim për ndokënd. Po atëherë ç’është, homeli? E cilat janë rregullat për një
predikim të mirë? Për t’iu përgjigjur
kësaj kërkese, që ndjehet prej kohe në Kishë, Kongregata për Kultin Hyjnor dhe Disiplinën
e Sakramenteve e botoi Drejtuesin homelitik, duke e shpërndarë përmes Shtëpisë Botuese
të Vatikanit, në gjuhën angleze, si gjuhë origjinale e duke e përkthyer edhe në italishten
zyrtare. Dy përkthime të tjera, në spanjisht e frëngjisht, do të shërbejnë si bazë
për Konferencat e ndryshme ipeshkvnore, të cilat kanë përgjegjësinë ta përhapin në
këto gjuhë të tjera. Teksti u paraqit më 10 shkurt, në Sallën e Shtypit të Selisë
së Shenjtë, gjatë një konference shtypi, drejtuar nga zëvendës-drejtori, atë Ciro
Benedettini. Mjet i pritur, që nuk lindi nga një ‘pse?’, kujtoi prefekti i Kongregatës,
kardinali Robert Sarah. Kërkesa për ta përmirësuar shërbimin e predikimit liturgjik
u diskutua që në Sinodin e ipeshkvijve të vitit 2005-së e, më pas, edhe në atë të
2008-tës. Benedikti XVI, pastaj, foli për nevojën e tij në Verbum Domini, ku
e quan predikimin “art, që duhet kultivuar”. E Papa Françesku, në Evangelii
gaudium nënvizon se nuk mund të “mbyllen veshët” përballë ankimeve, që vijnë për
këtë shërbesë kaq të rëndësishme”. Në të vërtetë, vijoi kardinali Sarah, nuk është
e lehtë të flasësh si duhet, ashtu siç është e vërtetë edhe se për predikimin “nuk
mjafton teknika”. Homelia duhet të shprehë gjithnjë jetën e meshtarit. Prifti duhet
të flasë për atë, që e jeton. E sidomos, të përgatitet gjithnjë në dialog me Hyjin
në lutje. Kështu, pra, Kongregata për Kultin Hyjnor dhe Disiplinën e Sakramenteve
e botoi “Drejtuesin”, me miratimin e Papës. I përbërë nga dy pjesë - njëra kushtuar
homelisë në fushën liturgjike e tjetra përqendruar mbi artin e predikimit, dokumenti
synon t’i pajisë meshtarët e seminaristët me koordinatat e metodologjisë e të përmbajtjes,
që duhen pasur mirë parasysh në përgatitjen e edhe në mbajtjen e homelisë. Folëm për
këtë me Sergio Tapia-Velasco, pedagog në Fakultetin e Komunikimit shoqëror
pranë Universitetit Papnor të Shenjtes Krygjë e koordinator i kursit “Arti i predikimit”:
Përgjigje:
- Në të vërtetë gjithçka nis me Gjon Palin II kur, më 1990, thirri një Sinod për
të studiuar si mund të përmirësohej formimi i meshtarëve dhe i seminaristëve. Që në
këtë çast lindi ideja se duhej bërë diçka për t’i ndihmuar meshtarët që të predikojnë
më mirë. Më pas Papa Benedikti XVI, në dy çaste të rëndësishme, gjithnjë në përfundim
të një Sinodi, atij kushtuar Eukaristisë, që përfundoi me Nxitjen “Sacramentum Caritatis”
në vitin 2007, foli për homelitë e mërzitshme, sepse tepër të përgjithshme ose abstrakte.
Ishte Benedikti XVI ai, që u kërkoi krerëve të Kongregatës së Kultit Hyjnor, të hartonin
një Drejtues Homelitik në këndvështrimin teorik, por gjithsesi, me vlera drejtuese.
Këkesën e bëri pas Sinodit kushtuar Fjalës së Zotit, më 2010, duke shkruar Nxitjen
Apostolike “Verbum Domini”, në numrin 6° të saj.
Pyetje: - Mund të na
e shpjegoni më konkretisht për çfarë bëhet fjalë?
Përgjigje: - Bëhet
fjalë për vijat udhëheqëse, që mund t’i frymëzojnë si meshtarët, në shërbesën e Fjalës,
ashtu edhe rektorët e seminareve, në përgatitjen e seminaristëve të tyre për këtë
art të bukur, por edhe tejet të vështirë të predikimit. Pa dyshim që të mund të përmirësohemi
në këtë drejtim, por ata, që përgatiten për meshtari, duhet ta marrin shumë seriozisht
përsosjen e tyre në këtë fushë.
Pyetje: - Si mund e si duhet bërë një
homeli e realizuar? Përgjigje: - Duhet të bësh pyetjet e duhura, për të
hartuar një homeli: ç’u intereson me të vërtetë besimtarëve? Ç’kërkon të thotë teskti?
Ç’i thotë ky lexim zemrës sime? Siç na kujton Papa Françesku, ka rëndësi të mos u
përgjigjemi pyetjeve, që nuk i bën askush: inter-lectio ka për qëllim “depërtimin
në brendi të tekstit”, synon të arrijë në zemër të asaj, që dëshiron të thotë teksti,
asaj, që dëshirojnë të dëgjojnë besimtarët e, sidomos, të asaj, që më thotë mua! Përndryshe
homelia tingëllon pa vërtetësi e, natyrisht edhe pa art. Rëndësi ka të kemi një pyetje,
që i jep shtysën nisjes së homelisë e ndërtimit të saj, duke ndjekur retorikën klasike,
pa harruar kurrë edhe format e komunikimit bashkëkohor.