Takimi i Këshillit të kardinajve për reformën e Kuries Romake
Përfundoi, sot pasdite, 11 shkurt, takimi treditor i Këshillit të nëntë kardinajve,
që punojnë për reformën e Kuries Romake, sipas dëshirës së Papës Françesku.Kardinajtë
do të mblidhen përsëri më 13 e 15 prill. Njoftimin e dha, gjatë takimit me gazetarët,
drejtori i Sallës vatikanase të Shtypit, atë Federiko Lombardi. Nuk parashikohet,
shtoi atë Lombardi, botimi i shpejtë i ndonjë dokumenti: kohët, natyrisht, janë të
gjata, duke pasur parasysh se po punohet për një kushtetutë të re, e jo për përditësimin
e së mëparshmes. Sot, dita e fundit e punimeve, Këshilli u angazhua, së pari, me
përgatitjen e Koncistorit, që do të mblidhet nesër, më 12 shkurt, si dhe me fjalën
e hyrjes, që do të mbahet nga kardinali Rodrigues Maradiaga. Gjithnjë gjatë ditës
së sotme, në mungesë të Papës Françesku, që ishte i zënë me audiencën e përgjithshme
në Sheshin e Shën Pjetrit, kardinali Pell i njohu kardinajtë me të rejat e veprimtarisë,
me organizimin e Sekretarisë dhe të Këshillit për ekonominë. Pasdite, në praninë
e Papës, foli kardinali O’Malley, që referoi për plenaren e sapopërfunduar të Komisionit
për mbrojtjen të miturve. Nga e enjtja, 12 shkurt, i gjithë Kolegji Kardinalor
do të mblidhet në koncistor, në Sallën e Sinodit. Paraditja, shpjegoi Atë Lombardi,
do të nisë me lutjen e Orës së Tretë e do të hapet me një përshëndetje të shkurtër
të Papës Françesku, ndjekur nga fjalimi i Dekanit të Kolegjit, kardinalit Sodano.
Para se të nisin diskutimet, kardinajtë do të dëgjojnë fjalën e hyrjes, mbajtur nga
kardinali Rodriguez Maradiaga dhe relacionin e sekretarit të Këshillit, ipeshkvit
Semeraro. Gjatë punimeve parashikohen fjalimet e kardinajve Pell e O’Malley.