Papa Françesku në Sarajevë, për të forcuar dialogun e paqen
Menjëherë pas njoftimit të papritur për shtegtimin e Papës në Sarajevë, ku do të jetë
më 6 qershorin e ardhshëm, kryeipeshkvi i qytetit, kardinali Vinko Puljiç, u takua
me myftiun e madh të bashkësisë islamike të Bosnjës e Hercegovinës, Husein Kavazoviç.
Bisedim i përzemërt, sipas agjencisë së shtypit katolik kroat Ika, që njoftoi
se gjatë takimit, prijësi shpirtëror mysliman e siguroi kryeipeshkvin se bashkësia
myslimane është e gatshme të japë ndihmesën e vet në organizimin e vizitës papnore,
që të mund të realizohet në një mënyrë sa më dinjitoze. Dialogu pasqyron harmoninë
e thellë ndërfetare, që karakterizon prej shekujsh historinë e Sarajevës, ndërprerë
vetëm nga koha e tmerrshme e luftës vëllavrasëse. Nuk është e rastit që, nësa
jepte njoftimin për këtë shtegtim, në lutjen e Engjëllit të Tënzot të 1 shkurtit,
Françesku shtoi, jashtë tekstit, disa fjalë, me të cilat saktësoi qëllimin e vizitës:
forcimin e vëllazërisë, të paqes, të dialogut ndërfetar e të miqësisë në këtë zonë.
Sarajeva, që do të vizitojë Papa Françesku, nuk është më qyteti martir, ku shkeli
Papa Gjon Pali II, më 1997. Nuk është “Jerusalemi i lindjes”, siç e pati quajtur Papa
polak, duke nënkuptuar edhe identitetin e tij si ishull ndërfetar e ndëretnik.
Sarajevasot është qytet simbol ku, megjithatë, mbetet detyrë urgjente nxitimi
i hapit për të arritur tek caku aq i dëshiruar: pajtimi e paqësimi. Takimi
i kryeipeshkvit me myftinë e madh, pohon edhe një herë karakterin ndërfetar të shtegtimit
njëditor të Papës në Sarajevë.