Festa e karnavaleve ne Shkodër krijon një atmosferë magjepëse. Të apasionuarit pas
karnavaleve u gëzohen qysh herët ditëve që u kushtohen. E nisur që në vitin 1860,
tani festa e karnavaleve ka krijuar portretin e saj shkodran, mbi bazën e traditave.
Kostume nga më të larmishmit, këngëtarë e qytetarë, të gjithë me maska. Paradë shumëngjyrëshe,
që shpaloset nga qendra, përgjatë rrugës muzeale “Kolë Idromeno”. Karnavalet e
Shkodrës kremtojnë përsëri këto ditë rilindjen, pas vdekjes së gjatë a tjetërsimit,
njëherësh me shumë tradita. Patën lindur në vitin e largët 1860, qenë dukur në fototekën
“Marubi” më 1913, patën lulëzuar deri më 1943, për t’u zhdukur në vitet e zymta, kur
njerëz me maska shiheshin për ditë në të katër anët e Qytetit të Veriut, veç në ditën
e festës së tyre, jo! Thuhet se Festën e maskave në Shkodër e sollën dy zanatçi
të huaj: një hungarez e një dalmat, të cilëve askush nuk ua mban mend emrin. Për
karnavalet e Shkodrës kanë shkruar disa shkodranë. Po kujtojmë vetëm Filip Ndocën,
Gjon Karmën, Sandër Gerën, Gjush Sheldinë, Kolë Gurashin, Lec Shllakun e Andre Skanjetin.
Mbas vitit 1943 Karnavalet erdhën duke u zbehur, thjesht për arsye politike. Në
vitet 1975-80, nuk qenë më festë popullore, por agjitative komuniste. Nuk respektohej
më as dita e fillimit të festës e as periudha 40 ditore. U ridukën në vitin 1998,
falë Shoqatës “Illyricum” të françeskanëve e nisën ta gjallërojnë vit për vit Qytetin
e Veriut, para se të nisë Koha pendestare e Kreshmëve, kur lagjet katolike të qytetit
vishen me ngjyrë vjollcë, për t’u riveshur me të gjitha ngjyrat e Pranverës në shpërthim,
në Festën e Ngjalljes së Zotit, për Pashkë!