Dita e lutjes kundër trafikut të njerëzve: luftë e fortë për dinjitetin
Sot, 8 shkurt, u kremtua Dita e parë ndërkombëtare e lutjes dhe e reflektimit kundër
trafikut të njerëzve, e dëshiruar fort nga Papa Françesku, organizuar nga Bashkimi
ndërkombëtar femëror e mashkullor i eprorëve dhe eproreve të përgjithshme rregulltare.
U ndez, kështu, një dritë, kundër tregtisë së njerëzve, pikërisht në ditën kur
Kisha kremton festën e shenjtores sudaneze Jozefina Bakhita, që kaloi nga skllavëria,
në liri, për të zgjedhur, më pas, rrugën e jetës së kushtuar. Figurë prekëse, që të
bën të reflektosh për këtë plagë, e cila edhe sot e kësaj dite i shndërron në skllevër
miliona njerëz nëpër botë: gra, fëmijë e burra. Tregtia e njerëzve, pohojnë rregulltaret
që janë në ballë të luftës kundër këtij fenomeni, e plagos dinjitetin e njeriut, i
shpërfytyron viktimat, bren jetë e histori individuale e familjare. E diela e
sotme është edhe ditë për të këputur vargonjtë e frikës, të padijes, të mohimit e
të indiferencës, që bashkëpunojnë në heshtje me këtë fenomen të tmerrshëm, me nxjerrjen
e njeriut në treg.
Dëshmia e motër Gandinit Motra Valeria Gandini,
misionare komboniane, prej disa vitesh në Palermo, e njeh nga afër dramën e emigracionit
e të formave të ndryshme të trafikut njerëzor. Ajo dha një dëshmi prekëse kushtuar
kësaj dite, në Sallën e Shtypit të Vatikanit, të martën e kaluar, kur po paraqitej
programi i kremtimit të sotëm.
Prostituta të mitura Kohët e fundit
vajzat e rrugës janë shtuar, e janë gjithnjë më të mitura. Vijnë nga të katër anët,
me gomone. E ndodh që edhe në qendrat e strehimit disa grupe punojnë me më të rejat
për t’i flakur, pastaj, në rrugë të madhe. I takojmë në skajet e skutat e qytetit
e mësojmë prej tyre se kanë ardhur nga qendrat e strehimit të Sicilisë. Po ç’tregojnë
këto-gra ende fëmijë? Të zhveshura, në pritje, nëpër udhët tona, në të gjitha orët
e ditës e të natës? Ç’na thonë? Me ç’emër t’i quajmë “klientët” e tyre, që janë gjyshat,
bashkëshortët, të fejuarit, bijtë, vëllezërit tanë?”. Klientët, shpjegon motër
Gandini, kanë një përgjegjësi shumë të madhe. Janë shfrytëzuesit e parë të vajzave,
njerëz që e pagujanë seksin me paratë, të cila më pas kalojnë në xhepat e organizatave
kriminale, të fshehura pas vajzave të mitura.
Tregtarë skllevërish, “të
paprekshëm” Ne, që shkojmë nëpër këto rrugë, i shikojmë. Janë përgjegjës të
gjithë, apo jo? Është një mungesë e hatashme përgjegjësie. Përtallen, shfrejnë e
pastaj kthehen pa pikë turpi në jetën e tyre të përditshme. Unë e kam thënë gjithnjë:
një burrë, që ka nevojë të blejë seksin, nuk mund të jetë burrë i vërtetë. Edhe ai
është skllav. Skllav i seksit, e nuk kujtohet. E bëhet, kështu, shfrytëzuesi i parë
i vajzave të varfra, edhe të atyre që janë ende të mitura. Më tmerrojnë klientët!
Njëlloj si trafikantët, këta shfrytëzues, që megjithatë enden të lirë, ku e si i
do qejfi. Doemos. Janë në rregull e nuk arrestohen. Ne i njohim, po i njeh edhe policia.
I njeh e nuk i prek. Pret t’i padisin vajzat e dhunuara, viktima të tyre. Po vajzat
kanë probleme të rënda e nuk guxojnë as të hapin gojën. Kanë frikë për familjet e
tyre, kanë frikë nga presionet, që pësojnë e, nganjëherë, edhe nga krimet.
Flitet
me shifra E pas dëshmisë së rregulltares, po cekim vetëm disa të dhëna të
OIM (Organizata ndërkombëtare e emigrantëve) që kujton se sot në botë më se 2 milion
e 500 mijë njerëz, janë viktimë e trafikut dhe e katandisjes në gjendje skllavi. 70%
prej tyre, janë gra e fëmijë.
Ligje më efikase Në këtë Ditë, në mbarë
botën buçet fort thirrja për të siguruar arsim për të gjithë, për ta mundur varfërinë,
sepse nuk mund t’i mbrosh viktimat, pa guximin e vendosmërinë për t’i bindur shtetet
të miratojnë ligje të suksesshme, që i kundërvihen trafikut e i ndalojnë organizatat
kriminale. E, mos të harrojmë, në tregjet e njerëzve, emri i Shqipërisë zë një vend,
që nuk e zë në asnjë lëmë tjetër të zhvillimit. E prej këndej dalin shpesh edhe paratë,
që pastrohen pastaj, në mënyra nga më të ndryshmet.
Lutje, në mbarë botën Sot
është dita e mbrëmësoreve të lutjes në mbarë botën. Edhe në të gjitha kishat e trevave
shqiptare. Në Romë mbrëmësorja u kremtua më 6 shkurt, në Bazilikën e Apostujve.
Veç këtyre kremtimeve, çdo njeri vullnetmirë mund të marrë pjesë aktive në këtë nismë,
përmes faqes së internetit www.slavesnomore.it,
duke ndezur kështu, një dritë e duke dërguar një histori shprese.