Papa Bergoglio: Greqi, shpirti i solidaritetit kundër kulturës së pesimizmit
T’i kundërviheni kulturës së pesimizmit, me besim në të ardhmen e të dëshmoni vëllazërinë
e solidarietin në të gjithë vendin. Për këtë i nxiti Papa, në fjalimin e dorëzuar,
prelatët e Konferencës ipeshkvnore të Greqisë, në Vatikan, për vizitën e tyre “ad
Limina Apostolorum”. Në fjalim theksohen problemet e detyrat e radhës së parë,
që duhet të kenë parasysh ipeshkvijtë në veprimtarinë e tyre, në një vend që po kalon
çaste të vështira ekonomiko-financiare. Papa i nxit ipeshkvijtë të ngjallin besim
e shpresë, me bindjen se kyçi për hapjen e portave të shpresës është pikërisht shpirti
i solidaritetit, që çdo i krishterë është i thirrur ta dëshmojë. Papa i porositi
ipeshkvijtë t’i mirëpresin emigrantët e të dialogojnë me përfaqësuesit e të gjitha
shtresave politike dhe kulturore, të ecin në udhën e ekumenizmit, të kujdesen për
klerin, të punojnë me zell apostolik e, pavarësisht nga numri i pamjaftueshëm i meshtarëve,
ta vijojnë misionin në viset helenike, duke u angazhuar posaçërisht në fushën shkollore,
ku Kisha katolike ka një traditë të lashtë. Nuk harron as familjen Papa, në fjalën
drejtuar ipeshkvijve katolikë të Greqisë. Flet për ligështimin e saj, shkaktuar edhe
nga procesi i shekullarizimit. Thekson punën baritore përgatitore, që duhet bërë me
çiftet para martesës dhe kujdesin për breznitë e reja, pa harruar të moshuarit, që
gjithnjë më shpesh braktisen e trajtohen me çkujdesje të pafalshme, në kontekstin
e kulturës së përjashtimit, të hedhurinës. Në përfundim Papa kujton se njohja
juridike e Kishës katolike nga ana e autoriteteve kompetente, është ngjarje me rëndësi
të madhe, që ndihmon pë ta shikuar më qetësisht ardhmërinë.