100 гадоў таму на працу ў Ватыкане была прынята першая жанчына
100 гадоў таму, 1
лютага 1915 г., у Ватыкане пачала працу першая жанчына. Рымлянку Анну Пецолі прызначылі
памочнікам у так званай “Floreria Apostolica”, структуры, адказнай за афармленне месц,
дзе адбываюцца сустрэчы з Папам. Толькі праз 11 гадоў пасля гэтай падзеі на працу
ў ватыканскія ўстановы былі прыняты наступныя жанчыны. Пра гэты мала вядомы раздзел
гісторыі Святога Пасаду распавяла журналістка Ватыканскага радыё Гудрун Зайлер, аўтарка
кніг, прысвечаных прысутнасці і працы жанчын у Ватыкане.
У 1926 г. былі прыняты
на працу першыя жанчыны рэстаўратары, якія прымалі ўдзел у аднаўленні каштоўных дываноў
з калекцыі Ватыканскіх музеяў. Гэта былі і законніцы, і свецкія верніцы.
У
“Floreria Apostolica” жанчыны працуюць і сёння. Законніцы шыюць шторы і займаюцца
ўтрыманнем у адпаведным стане мяккай мэблі. Гэты ватыканскі аддзел таксама нясе адказнасць
за матэрыяльна-тэхнічнае забеспячэнне цырымоній з удзелам Святога Айца. У яго склад
уваходзіць некалькі майстэрняў ад швейнай да сталярнай.
Сярод першых жанчын,
занятых у Ватыкане, была яўрэйка Эрміна Шпаер. Перад тым, як трапіць сюды, яна працавала
ў Нямецкім археалагічным інстытуце ў Рыме. Пасля прыходу нацыстаў да ўлады ў 1934
годзе была звольнена, не магла вярнуцца на нямецкую радзіму і тэрмінова шукала працу.
Тады дырэктар Ватыканскіх музеяў Барталамеа Нагара наняў яе для распрацоўкі і кіравання
фота-бібліятэкай. Ён зрабіў гэта кіруючыся хрысціянскай запаведдзю любові да бліжняга.
Выдатная кваліфікацыя Шпаер дазволіла абараніць яе перад крытыкамі, якія не маглі
пагадзіцца з яўрэйскім паходжаннем жанчыны.
Пры падтрымцы папы Пія XI, які
сябраваў з Нагара, яна магла без праблем працаваць у Ватыкане. У 1939 г. жанчына прыняла
каталіцтва і падчас нацысцкай акупацыі Рыма ў 1943-1944 гадах знайшла прытулак у адным
з жаночых манастыроў Вечнага горада.