“Ватыканская пракуратура” падвяла вынікі сваёй дзейнасці
Ватыканская судовая
сістэма правяла інтэнсіўны 2014 год. Разглядаліся справы якія датычылі, сярод іншага,
дзіцячай парнаграфіі, махлярства на шкоду Інстытута рэлігійных спраў – Ватыканскага
банку, – а таксама незаконнага абароту наркотыкаў. Аб гэтым паінфармаваў прамотар
справядлівасці Дзяржавы Ватыкан (што адпавядае пасадзе генеральнага пракурора) Джан
Пьера Мілана ў рапарце на адкрыццё новага года працы ватыканскай установы.
Ён
назваў асабліва паспяховай барацьбу з фінансавай злачыннасцю, у прыватнасці з адмываннем
“брудных грошай”. На яго думку, тут дапамаглі шырокамаштабныя рэформы, якія забяспечылі
лепшы кантроль над фінансамі Ватыкана. У гэтым кантэксце ён нагадаў пра прысуд пазбаўлення
волі на чатыры гады аднаго з ватыканскіх прэлатаў, абвінавачанага ў сур’ёзных фінансавых
злачынствах. Таксама Бюро фінансавай інфармацыі перадало Трыбуналу Дзяржавы Ватыкан
дакументы, што змяшчаюць падазрэнні ў пяці іншых такога роду выпадках. У 2014 г. былі
разгледжаны дзве справы адносна абвінавачванняў у дзіцячай парнаграфіі.
Са
справаздачы прамотара вынікае, што ў 2014 г. на тэрыторыі Ватыкана было затрымана
ў агульнай складанасці 6 чалавек – значна больш, чым годам раней. Сярод іх былі: фемінісцкая
актывістка, якая ў Божае Нараджэнне ў аголеным выглядзе пратэставала супраць Касцёла,
і беспрацоўны, які неаднаразова спрабаваў падняцца на купал базылікі св. Пятра.
У
асобных выпадках “ватыканская пракуратура” займалася справамі адносна незаконнага
абароту наркотыкаў, паведаміў Мілана. Прадстаўляючы свой даклад, ён прапанаваў магчымасць
паляпшэння тэлефоннага нагляду, але ў той жа час назваў праслухоўванне тэлефонных
размоў “непрымальным інструментам расследавання”.