Տեառնընդառաջ և անդաստանօրհնէք Զմմառու վանքին մէջ։

Կիրակի 1 Փետրուար 2015-ին, առաւօտեան ժամը 8:00-ին, Զմմառու վանքի եկեղեցիին մէջ, Ս. Պատարագի ընթացքին, զոր մատոյց Զմմառու Պատրիարքական Կղերի Միաբանութեան Պատրիարքական Փոխանորդ և Մեծաւոր Զմմառու վանքի Գերապայծառ Հ. Գաբրիէլ Թ.Ծ.Վ. Մուրատեան, կատարուեցաւ Տեառնընդառաջի մոմեղինաց օրհնութիւն: Մոմը հաւատքի աննիւթական արտայայտութիւն դարձած է: Մոմերն ու կանթեղները եկեղեցւոյ խորհրդաւորութիւն և վեհութիւն կու տան: Իսկ մոմի լոյսը խորհրդանիշն է Յիսուս Քրիստոսին՝ «Աշխարհի լոյսին» (Յովհ 8,12): Նոյն օրը՝ առաւօտեան ժամը 10:30-ին, Զմմառու վանքին Մայր տաճարին մէջ, Գեր. Հ. Մաշտոց Վրդ. Զահթերեան Ձայնաւոր Ս. Պատարագ մատոյց և Մոմեղինաց Օրհնութեան կարգը կատարեց:
Ապա՝ երեկոյեան , Զմմառու Վանքի Եկեղեցւոյ գաւիթին մէջ, Տեառնընդառաջի տօնին առիթով, ժամերգութենէն ետք անդաստանօրհնէք տեղի ունեցաւ, մասնակցութեամբ՝ Զմմառու Պատրիարքական Կղերի Միաբանութեան Պատրիարքական Փոխանորդ և Մեծաւոր Զմմառու վանքի Գերապայծառ Հ. Գաբրիէլ Թ.Ծ.Վ. Մուրատեանի, Վարչական և Վանաբնակ Հայրերու և զոյգ դպրեվանքերու Ժառանգաւորաց: Հինաւուրց աւանդութեան համաձայն, խարոյկ վառուեցաւ և անդաստանօրհնէք կատարուեցաւ բոցավառ կրակին շուրջ: Այսօր՝ Եկեղեցին կը գովերգէ Քրիստոսի աշխարհ բերած լոյսը, ըստ Սիմէոն ծերունիին մանուկ Յիսուսին ուղղած խօսքին. «Լոյս ի յայտնութիւն հեթանոսաց»: Իսկ կրակին շուրջ դառնալու աւանդութիւնը եկած է հայոց հեթանոսական շրջանէն: