Святы Айцец супраць “прыватызацыі” веры і збаўлення
Новым шляхам, які
адкрыў Езус, не ідуць тыя, хто “прыватызуе” веру і лічыць сябе часткай “касцёльных
эліт”, сказаў папа Францішак 29 студзеня 2015 г. падчас ранішняй св. Імшы ў Ватыкане.
У сваёй гаміліі Пантыфік указаў на некаторыя “памылковыя” формы наследавання Хрыста.
Адной з іх з’яўляецца “прыватызацыя” веры. Папа нагадаў, што Езус збавіў кожнага чалавека
асабіста, але, у той жа час, як частку народа. Яшчэ з часоў Абрагама, Бог паабяцаў
стварыць народ, у якім ён збаўляе, патлумачыў Францішак. Менавіта таму, на яго думку,
важна памятаць аб збаўленні іншых людзей. “Няма збаўлення выключна для мяне. Калі
разумею яго так – памыляюся, іду не туды. Прыватызацыя збаўлення – гэта памылковы
шлях”, - падкрэсліў Папа.Святы Айцец вылучыў тры крытэрыі, якія дапамагаюць не “прыватызаваць”
збаўленне: “вера ў Езуса, які нас ачышчае”, надзея, якая дазваляе ісці наперад, і
любоў – “наданне ўвагі адно аднаму, узаемнае стымуляванне да любові і добрых спраў”.
Францішак
нагадаў пра важнасць дзялення верай, надзеяй, любоўю, а не проста прысутнасцю ў парафіі.
Адначасова ён асудзіў існаванне парафіяльных “групак” або “парафіяльнай эліты”, якія
часта з’яўляюцца цэнтрамі асуджэння і пагарджання іншымі, нібыта “прыватызуючы” збаўленне.
Папа заклікаў кожнага верніка ў малітве прасіць аб ласцы ўспрыняцця сябе у якасці
члена ўсяго Божага народу, якога Пан збавіў асабіста.