Францішак: пошук хрысціянскага адзінства – гэта не прывілей толькі пэўных асоб або
супольнасцяў
“Шмат супярэчнасцяў
паміж хрысціянамі, якія дасталіся ў спадчыну ад мінулага, могуць быць пераадолены
адкладаючы ў бок рознага роду палемічны або апалагетычны падыход і імкнучыся разам
да глыбокага разумення таго, што нас аб’ядноўвае, а менавіта паклікання да ўдзелу
ў таямніцы любові Айца, аб’яўленай нам праз Сына за пасрэдніцтвам Святога Духа”, -
сказаў Пантыфік 25 студзеня 2015 г. падчас урачыстых Нешпараў у рымскай базыліцы св.
Паўла за Мурамі. Набажэнства завяршыла Тыдзень малітваў аб еднасці хрысціянаў. “Хрысціянскае
адзінства не з’яўляецца вынікам тонкай тэарэтычнай дыскусіі, у якой кожны будзе спрабаваць
пераканаць іншых у правільнасці сваіх поглядаў. Мы павінны разумець, што для таго,
каб дасягнуць глыбіні таямніцы Бога, мы патрабуем узаемнай сустрэчы і абмену думкамі
пад кіраўніцтвам Святога Духа, Які гарманізуе разнастайнасць і пераадольвае канфлікты”,
- перакананы Папа.
Францішак спаслаўся на хрост, у якім “праз Святога Духа
мы сталі адным з Хрыстом, сынамі ў Сыне, сапраўднымі прыхільнікамі Айца”. “Менавіта
таямніца любові з’яўляецца самым глыбокім матывам адзінства; яна аб’ядноўвае ўсіх
хрысціян і з’яўляецца нашмат большай ад падзелаў, якія мелі месца на працягу ўсёй
гісторыі. Па гэтай прычыне, наколькі мы пакорліва наблізжаемся да Пана Езуса Хрыста,
настолькі мы набліжаемся адзін да аднаго”, - лічыць Пантыфік.
Ён нагадаў евангельскі
фрагмент пра сустрэчу Езуса з Самаранкай, з якой была ўзята тэма Тыдня малітваў: “Дай
мне піць”. Папа заўважыў, што прыклад Хрыста заахвочвае да мірнага абмену думкамі
з іншымі. Для таго, каб зразумець адзін аднаго і расці ў любові і праўдзе, трэба спыніцца
і прыняць і слухаць адзін аднаго. Такім чынам, мы ўжо пачнём адчуваць адзінства, перакананы
Францішак.
Пантыфік заўважыў, што сустрэча з Хрыстом аднавіла ў Самаранцы “сэнс
і радасць жыцця”, і яна адчула жаданне падзяліцца гэтым з іншымі. “Сёння шмат мужчын
і жанчын, стомленых і прагнучых, якія просяць нас, хрысціян, каб мы далі ім піць.
Гэта просьба, ад якой мы не можам уцячы. У пакліканні быць евангелізатарамі ўсе Цэрквы
і супольнасці знаходзяць важную прастору для больш цеснага супрацоўніцтва. Для таго,
каб паспяхова выконваць гэту задачу, трэба пазбегнуць замкнутасці ў партыкулярызме
і эксклюзівізме, а таксама навязвання аднастайнасці паводле чыста чалавечых планаў.
Агульныя абавязацельствы абвяшчаць Евангелле дазваляюць пераадолець усе формы празелітызму
і спакус канкурэнцыі. Усе мы служым аднаму і таму ж Евангеллю!”, - падкрэсліў Францішак
і дадаў, што пошук хрысціянскага адзінства не можа быць прывілеем толькі пэўных асоб
або рэлігійных супольнасцяў.
Малітвы падчас экуменічнага набажэнства прачыталі,
у прыватнасці, праваслаўны Мітрапаліт Генадзіос, прадстаўнік Канстантынопальскага
Патрыярхату і епіскап Дэвід Моксан, асабісты прадстаўнік Архіепіскапа Кентэрберыйскага.
Прадстаўнікі розных Цэркваў і супольнасцяў таксама чыталі фрагменты Святога Пасання.