Përkthimi i parë i katekizmit të Kishës katolike në gjuhën farsi
Më 12 janar, në Romë, u paraqit përkthimi i parë i Katekizmit të Kishës katolike
në gjuhën farsi, nën kujdesin e Universitetit të Feve e Konfesioneve të qytetit
iranian Qom. Kujtojmë se farsi, apo persisht (فارسی fārsī
[fɒːɾˈsiː]) është gjuhë iraniane e folur në Iran, Taxhikistan, ku zyrtarisht quhet
(forsi-i) tojiki, në Afganistan, ku quhet (fārsī-ye)
dari, dhe në Uzbekistan. Katekizmi i Kishës katolike është një nga
frytet më të rëndësishme të Koncilit II të Vatikanit (Porta fidei, 11). Këto janë
fjalët e Papës Benedikti XVI. E pas këtyre fjalëve, atë Dariusz Kowalczyk, dekan i
Teologjisë pranë Universitetit Papnor Gregorian, i ftuar nga Radio Vatikani, pati
realizuar një cikël kushtuar Besojmës, sipas Katekizmit të Kishës katolike, të cilin,
të përkthyer në shqip, e transmetuam gjatë vitit 2013-14. Tani Katekizmi po përkthehet
edhe në gjuhë, që nuk lidhen me botën e krishterë, siç është gjuha farsi, të cilën
e flasin më se 75 milionë vetë. Kujtojmë edhe se Papa Benedikti XVI, me rastin
e Vitit të Fesë, që u kremtua duke nisur nga 11 tetori 2012, u pati drejtuar gjithë
besimtarëve një thirrje të fuqishme për ta lexuar rregullisht Katekizmin. Në letrën
e bukur apostolike “Porta fidei” me të cilën shpalli Vitin e Fesë, Benedikti XVI shprehu
bindjen se Katekizmi është mjet e mbështetje e fesë. “Në Katekizëm, shkruan Papa,
shikojmë pasurinë e mësimit që Kisha e pranoi, e ruajti dhe e përcolli gjatë dymijë
vjetëve të historisë së saj. Nga Shkrimi Shenjt, tek Etërit e Kishës; nga Mësuesët
e Teologjisë, tek Shenjtorët, që përshkuan shekujt, Katekizmi ofron kujtesën e vazhdueshme
të mënyrave, me të cilat Kisha meditoi për fenë e prodhoi progres në doktrinë për
t’u dhënë siguri besimtarëve në jetën e tyre të fesë”. Botimi i Katekizmit në
gjuhën farsi, na kujton se është i botuar edhe në gjuhën shqipe e se porositë e Benediktit
XVI tingëllojnë jashtëzakonisht aktuale edhe për jetën e fesë së besimtarëve e të
jo besimtarëve shqiptarë. Shkrimin Shenjt e Katekizmin, ngulmon vazhdimisht Papa
Françesku, duhet t’i kemi gjithnjë pranë e t’i shfletojmë ditë për ditë, për t’i dhënë
forcë e jetë fesë sonë.