Папа сустрэўся са спецыялістамі па каталіцка-ісламскім дыялогу
Пантыфік сустрэўся
24 студзеня 2015 г. у Ватыкане з членамі Папскага інстытута арабскіх і ісламскіх даследаванняў
з нагоды 50-годдзя яго заснавання. Ён адзначыў, што “у апошнія гады, нягледзячы на
некаторыя непаразуменні і цяжкасці, удалося асягнуць прагрэс у міжрэлігійным дыялогу,
у тым ліку і з прадстаўнікамі ісламу”. Гэтаму, на думку Францішка, дапамагло ўменне
слухаць адно аднаго, што з’яўляецца “не толькі неабходнай умовай у працэсе ўзаемаразумення
і мірнага суіснавання”, але таксама “педагагічным абавязкам”, у сэнсе прызнання каштоўнасцяў
іншых людзей, зразумення іх асноўных праблем і патрабаванняў. Пантыфік перасцярог
ад “пагаджальнага сінкрэтызму”, які прыводзіць у рэшце рэшт да “таталітарызму без
каштоўнасцяў”. Калі мы сустракаем чалавека з яго верай і рэлігіяй, гэта прымушае нас
запытацца ў сябе пра нашу ўласную духоўнасць, лічыць Папа. Таму ў пачатку дыялогу
заўсёды павінна стаяць сустрэча, паколькі менавіта яна “генеруе першае пазнанне іншага”,
дапамагае “пераадолець забабоны і хлусню” у адносінах да чалавека іншай рэлігіі.
І
тут досвед Папскага інстытута арабскіх і ісламскіх даследаванняў незаменны, перакананы
Пантыфік, бо яго навуковая праца дазваляе адмовіцца ад таго, што знаходзіцца “на паверхні,
што прыводзіць да стэрэатыпаў і прадузятасці”, і імкнуцца да пазнання крыніц, кіруючыся
“компасам узаемнай павагі”. Гэта асабліва важна ў наш час, калі некаторыя спрабуюць
апраўдаць насілле з дапамогай рэлігіі. “Найбольш эфектыўным проціяддзем супраць любой
формы гвалту з’яўляецца адукацыя”, - адзначыў Папа.
Ісламска-хрысціянскі дыялог
– задача не лёгкая, лічыць Форанцішак, ён “патрабуе цярпення і пакоры, якія суправаджае
дбайнае даследаванне”, паколькі “імправізацыя” у гэтай тэме можа быць контрпрадуктыўнай
і выклікаць дыскамфорт і збянтэжанасць. Спецыялізаваная адукацыя ў галіне ісламска-хрысціянскага
дыялогу не павінна абмяжоўваецца выключна сацыялагічным аналізам”, але мець “рысы
падарожжа паміж людзьмі, якія належаць да рэлігій, і, хоць і па-рознаму, адносяцца
да духоўнага бацькоўства Абрагама”. “Культура і адукацыя не з’яўляюцца другаснымі
ў працэсе сапраўднага збліжэння, які ўключае павагу да кожнага чалавека”, - сказаў
Святы Айцец.
Папскі інстытут павінен граць больш значную ролю сярод акадэмічных
устаноў Святога Пасаду і станавіцца цэнтрам “фармацыі хрысціян, якія працуюць у галіне
міжрэлігійнага дыялогу пад эгідай Кангрэгацыі Каталіцкай Адукацыі, і ў цесным супрацоўніцтве
з Папскай радай па міжрэлігійным дыялогу”, лічыць Францішак. Ён выказаў спадзяванне,
што ўстанова ніколі не здрадзіць сваёй асноўнай задачы – слуханню і дыялогу, заснаваных
на выразнай ідэнтычнасці, на пошуку ісціны і прыгажосці, “змешчаных Творцам у сэрцы
кожнага мужчыны і жанчыны і бачных у любым сапраўдным рэлігійным памкненні”.