Më 17 e 18 janarin e kaluar Provinca Françeskane shqiptare, Biblioteka Publike “Marin
Barleti” dhe Shoqëria “Illyricum” e qytetit të Shkodrës, organizuan veprimtarinë,
titulluar “Át Shtjefën Gjeçovi thesar në hulumtim”, në kuadrin e 140-vjetorit të lindjes
(Janjevë, 12 korrik 1873- Zym, 14 tetor 1929). Veprimtaria, e organizuar në Sallën
“Illyricum”, nisi me hapjen e ekspozitës me dorëshkrime e libra të biliotekës personale
të Gjeçovit, që ruhen në Bibliotekën françeskane “Át Gjergj Fishta” dhe në bibliotekën
“Marin Barleti”. Të pranishmit ndoqën disa kumtesa, që u krijuan mundësinë ta njihnin
më thellë e edhe më gjerë, figurën poliedrike të Át Gjeçovit, në disa nga këndvështrimet
më të spikatura të saj: si edukator i vlerave njerëzore dhe atdhetare, përmes veprës
“Agimi i Gjytetniís”; në kumtesën mbajtur nga Át Viktor Dema; si njohës i lashtësisë
së etnisë sonë, përmes fondeve arkivore Gjeçov, në punimin e Jaho Brahaj; si letrar,
i parë nga Faik Konica, në kumtesën e Alfred Çapalikut; si arkeolog, parë nga Villy
Kamsi, e, sidomos, si mbledhës i Kanunit, parë në disa këndvështrime e prej disa kumtuesve,
ndërmjet të cilëve, Bardhyl Demiraj me kumtesën “Fe e preme në kanun”, Ardian Ndreca
me “Instituti i martesës në Kanunin e Lekë Dukagjinit”; Gëzim Puka me “Jehona ndërtekstësore
e Kanunit përmes një teksti dramatik të letërsisë bashkëkohore” etj. U sollën edhe
të dhëna të reja lidhur me jetëshkrimin e Gjeçovit e për personalitetin e tij, përmes
faqeve të shtypit katolik si dhe për publicitikën e fratit françeskan. Trajtesat
shkencore të tubimit do të botohen në një vëllim të veçantë. Kjo dita e parë. Ditën
e dytë, më 18 janar, ansambli artistik “Katerina Josip” i Zymit dha një koncert, që
u ndoq me entuziazëm nga shikuesit.Të krijohej sadopak përshtypja e kthimit të kohëve
të lumnueshme të Provincës, kur nga kjo tribunë fliste Át Gjergj Fishta, ligjëronte
Át Anton Harapi, shfaqeshin dramat e para të shqipes e Át Martin Gjoka krijonte e
drejtonte operën e parë shqiptare, “Judën Makabe”.