Վեցամսեայ Սերիոժա Աւետիսեանի կեանքը կարելի չեղաւ փրկել
Հայաստանի Հանրապետութեան առողջապահութեան նախարարութենէն հաղորդեցին, որ վեցամսեայ
Սերիոժա Աւետիսեանի կեանքը կարելի չէ եղած փրկել: Կիրակի երեկոյեան երեխայի առողջական
վիճակը կտրուկ վատացած էր: Արդէն 7-րդ օրը կեանքի համար պայքարող երեխային մօտ խորացած
էր երիկամային եւ սրտանօթային անբաւարարութիւնը: Հակառակ հայաստանեան եւ արտերկրի
յառաջատար մասնագէտներուն կողմէ ձեռնարկուած վերակենդանացման շարունակական, երկարատեւ,
անընդմէջ միջոցառումներուն` ցուցանիշները կարելի չէ եղած բարելաւել, զարգացած է սրտանօթային,
թոքային, երիկամային անբաւարարութիւնը, տեղի ունեցած են անդառնալի փոփոխութիւններ, որոնք
յանգեցուցած են մահուան: Առողջապահութեան նախարարութենէն երէկ կէսօրէ ետք փոխանցած
են, որ երեխային մօտ արձանագրուած է կենսաբանական մահ: