Mbledhje e BE-së për terrorizmin: bankë të dhënash për udhëtarët e avionëve
Evropa përpiqet t’i japë një përgjigje të përbashkët kërcënimit terrorist. Në Këshillin
e Ministrave, që u mbajt dje në Bruksel, u diskutua për statistikat e udhëtarëve,
që lëvizin me avion, si edhe për bashkëpunimin me vendet arabe. Ndërkaq, në shumë
vende myslimane, nuk ndalen protestat për karikaturat e reja satirike, publikuar nga
Charlie Hebdo. Nga takimi i djeshëm i ministrave të jashtëm evropianë, doli kërkesa
për të zhbllokuar direktivën mbi krijimin e një banke me të dhënat e pasagjerëve,
ndërsa javët e ardhshme do të nisin “projekte specifike” bashkëpunimi me vende si
Egjipti, Jemeni, Algjeria, vendet e Gjirit Persik dhe Turqia. Në takim ishte i pranishëm
edhe Sekretari i Përgjithshëm i Lidhjes Arabe, Nabil El Araby. U vu në dukje se në
Evropë ndodhen aktualisht 3-5 mijë luftëtarë të huaj, xhihadistë, që mund të hyjnë
në veprim nga çasti në çast. Mdërkaq, në vendet myslimane vazhdojnë protestat
kundër karikaturave të së përjavshmes “Charlie Hebdo”. Në Niger u shpallën tri ditë
zie kombëtare, pasi gjatë protestave, u vranë së paku 10 vetë dhe u dogjën 45 kisha.
Protesta nëpër sheshe edhe në Afganistan, Pakistan e Iran. Një det me njerëz në Grozni
të Çeçenisë, ku vlerësohet se në favor të profetit Muhamet kanë manifestuar rreth
një milion vetë.