Papa takohet me babain e vullnetares, që humbi jetën në Takloban
Papa Françesku e hapi takimin me të rinjtë e Filipineve – mëse 30 mijë vetë, mbledhur
në kopshtet e Universitetit të Shën Tomës, në Manila – me një lajm të trishtuar, ndodhur
dje gjatë meshës në Takloban: “Dje, kur
po fillonte mesha, një pjesë e skelës ra dhe goditi një vajzë të re, që po punonte
e që vdiq. Emri i Saj është Kristel. Punonte si vullnetare në organizimin e meshës,
ishte 27 vjeç. Ishte e re si ju. Punonte për një shoqatë, që quhet ‘Catholic Reliefe
Services’, ishte vullnetare. Dua që ju të gjithë, bashkëmoshatarët e saj, të mbani
një minut heshtje… Lutemi edhe për nënën e babain e saj. Ishte vajzë e vetme”. Pasi
u kthye në nunciaturë, pas meshës me rininë në stadiumin e kryeqytetit filipinas,
rreth orës 12.00, Papa Françesku u takua me të atin e vullnetares, i cili shoqërohej
nga një kushëri. Sipas lajmeve të drejtorit të Sallës së Shtypit të Vatikanit, atë
Federiko Lombardi, biseda zgjati 20 minuta, qe mallëngjyese e pati si përkthyes kardinalin
filipinas Tagle. Në tryezë, dy fotografi të bukura të vajzës, njëra aktuale e tjetra,
kur ishte e vogël, së bashku me prindërit. I ati tha se ngushëllohej disi, kur mendonte
se e bija kishte përgatitur takimin e Taklobanit me Papën. U bënë përpjekje për t’i
telefonuar së ëmës në Hong Kong, por pa rezultat. Nëna e Kristelit mbërrin nesër në
Manila.