Святы Айцец звярнуўся да філіпінскіх святароў і наведаў цэнтр для беспрытульных дзяцей
Бедныя знаходзяцца
ў цэнтры Евангелля. Калі мы ўбярэм бедных з Евангелля – не зможам зразумець паслання
Хрыста, – адзначыў папа Францішак 16 студзеня 2015 г. падчас Эўхарыстыі ў катэдральным
касцёле Манілы, якую разам з Пантыфікам канцэлебравалі каля 600 мясцовых біскупаў
і святароў. У сваёй гаміліі Пантыфік нагадаў, што дзейнасць мінулых пакаленняў каталіцкіх
пастыраў дазволіла пашырыць Евангелле ў краіне, а таксама пабудаваць грамадства, заснаванае
на міласэрнасці, прабачэнні, дабрачыннасці і салідарнасці. На яго думку, сённяшнім
важным заданнем з’яўляецца будаўніцтва мастоў, якія б дапамагалі народам Азіі прымаць
Божае слова і на ім будаваць больш справядлівы грамадскі лад, змагацца з прычынамі
няроўнасці і несправядлівасці. Евангелле заклікае хрысціянскія супольнасці ствараць
“гурткі сумленнасці”, сеткі салідарнасці, якія маглі б пашырацца на ўсё грамадства,
лічыць Папа.
Пантыфік нагадаў святарам і кансэкраваным асобам пра важнасць
штодзённай малітвы і барацьбы са спакусай прывязанасці да зямных дабротаў. Барацьба
з матэрыялізмам і самалюбаваннем, увага да іншых, робяць асобу больш сумленнай і поўнай,
што неабходна для эфектыўнага распаўсюджвання Евангелля ў грамадстве, якое прызвычаілася
да маргіналізацыі, палярызацыі і шакуючай няроўнасці.
Асаблівым чынам Святы
Айцец звярнуўся да маладых святароў і семінарыстаў, якіх заклікаў быць бліжэй да моладзі,
якая заблыталася, але ўсё ж працягвае бачыць у Касцёле спадарожніка і крыніцу надзеі.
“Будзьце бліжэй да тых, хто жыве ў грамадстве, дзе квітнее галеча і карупцыя, да тых,
хто расчараваўся і хоча кінуць школу і жыць на вуліцы. Абвяшчайце хараство і праўду
хрысціянскага сужэнства ў грамадстве, якое заблыталася ў сваім бачанні сэксуальнасці,
шлюбу і сям'і”, – пажадаў папа Францішак.
500-гадовая гісторыя хрысціянства
на Філіпінах дазволіла стварыць вялікі місіянерскі патэнцыял, які павінен прывесці
да засваення сучаснай моладдзю хрысціянскай культуры, пранікнення хрысціянскага духу
ў філіпінскае грамадства, а праз яго, у іншыя краіны свету, лічыць Святы Айцец.
Пасля
св. Імшы, перш чым вярнуцца ў Апостальскую нунцыятуру, папа Францішак наведаў каталіцкі
цэнтр для беспрытульных дзяцей. Візіт працягваўся каля 20 хвілін, а сустрэцца з Пантыфікам
маглі каля 320 дзяцей.