Papa para Trupit Diplomatik: “Kultura e përjashtimit lind luftë, mikpritja, paqe!”
Papa Françesku e nisi me një lutje, fjalimin e tij tradicional të fillimit të vitit,
drejtuar Trupit Diplomatik, akredituar pranë Selisë së Shenjtë: “Sot, nënvizoi që
në fjalët e para, dëshiroj të tingëllojë me forcë një fjalë tepër e dashur për ne:
Paqe!”. Trupi Diplomatik i akredituar pranë Selisë së Shenjtë, pritur sot nga Papa
Bergoglio, përbëhet nga ambasadorët e 180 Shteteve, që aktualisht kanë marrëdhënie
të plota diplomatike me Selinë e Shenjtë. Këtyre u duhen shtuar Bashkimi Evropian,
Urdhri Sovran i Maltës e një Mision me natyrë të veçantë, ai i Shtetit të Palestinës.
Tema, që u zhvillua nga Papa Françesku deri në hollësi, në të gjithë fjalimin drejtuar
Trupit Diplomatik, qe rast i përshtatshëm, për t’u ndaluar tek situata në botë. Drama e jetës
së Jezusit, dramë e jetës njerëzore Papa e mori shtytjen nga figura e Shpellës
së Betlehemit që, përveç paqes, flet edhe për një realitet tejet dramatik: atë të
refuzimit. Mendimi i Françeskut shkoi te ikona e Lindjes së Krishtit e Andrej Rublëv,
që nuk e paraqet Krishtin Fëmijë në djep, por në varr, për të lidhur Krishtlindjen
me Pashkët, duke rrëfyer, kështu, se pranë e pranë me pritjen gazmore për lindjen
e re, është e gjithë drama e jetës së Jezusit, deri në vdekjen mbi kryq. Liderët
myslimanë ta dënojnë çdo lloj interpretimi fundmentalist e ekstremist të fesë Nuk
i harroi as atentatet e Parisit, Papa, për të rikujtuar me forcë, pastaj, zhvillimet
në Siri e Irak e për t’u kërkuar lidërve myslimanë ta dënojnë çdo lloj interpretimi
fundamentalist e ekstremist të fesë. Vijoi, pastaj, me kritikën e kulturës individualiste,
që e përjashton familjen. Duke kujtuar rrëfimet mbi Lindjen e Krishtit, theksoi
se që në çastet e para Krishti Fëmijë u përjashtua, u la jashtë, në acar. E nëse njerëzit
u sollën kështu me Birin e Zotit, si do të sillen me vëllezërit e motrat tona? Emblemë
e kësaj sjelljeje është Herodi mbret, që mbyt një mori fëmijësh të Betlehemit, kujtoi
Françesku e mendimi i tij vrapoi shpejt nga Betlehemi, në Pakistan, ku një muaj më
parë u therën më se njëqind fëmijë, me një mizori të padëgjuar. Zë, që ngrihet
kundër çdo lloj skllavërimi të njeriut e çdo lloj lufte Kulturës që përjashton
tjetrin duke lindur dhunë e vdekje, Papa i shtoi një numër të madh faktesh të kronikës
së përditshme, ndërmjte të cilave, masakra tragjike e Parisit, pak ditë më parë, në
një botë, ku të tjerët shikohen si sende, e njeriu, nga i lirë që lind, bëhet skllav,
herë i modës, herë i pushtetit, herë i parasë, e herë-herë, deri i formave dredharake
të fesë. Duke folur për pasojat e kësaj mendësie, Françesku kujtoi përsëri se sot
ka shpërthyer lufta e vërtetë, e tretë, botërore, luftë e luftuar pjesë- pjesë, zonë-zonë,
në skaje e skuta të ndryshme të Planetit, duke nisur nga Ukraina. Terrorizmi
përjashton Zotin e njeriun Prej këndej, kujtoi Lindjen e Mesme e zonat e tjera
në konflikt, si Siria e Iraku, ku vijon terrorizmi me vulë fundamentaliste fetare,
edhe ky, fenomen i kulturës së përjashtimit. Në këtë rast, njeriu përjashton Zotin,
duke e lidhur refuzimin me një pretekst thjesht ideologjik. Papa kërkon përgjigje
të njëzëshme kundër dhunës Përballë gjithë kësaj padrejtësie, gjithë këtij
agresioni, shhtoi, që godet shumë të krishterë e grupe të tjera etnike në Zonë, duhet
dhënë një përgjigje e njëzëshme që, në kuadrin e së drejtës ndërkombëtare, ta ndalojë
përhapjen e dhunës, të rivendosë harmoninë e të shërojë plagët e thella, shkaktuar
nga konfliktet. Nga selia e këtij takimi, Papa i bëri thirrje mbarë bashkësisë ndërkombëtare,
ashtu si edhe qeverive të interesuara, të ndërmarrin nisma konkrete për paqen e t’i
mbrojnë njerëzit që vuajnë pasojat e luftës e të persekutimit e detyrohen të lënë
shtëpi e atdhe. Papa i ftoi islamikët ta ngrejnë zërin kundër dhunës, që ta dëgjojë
mbarë bota. Më pas, duke e nxitur bashkësinë ndërkombëtare t’i japë fund indiferencës
përballë një situate të tillë, uroi që liderët fetarë, politikë e intelektualë, posaçërisht
myslimanë, ta dënojnë çdo interpretim fundamentalist dhe ekstremist të fesë, që synon
të përligjë aktet e dhunës. Angazhim i Bashkësisë ndërkombëtare për Afrikën Papa
kujtoi edhe fëmijët, viktima të terrorit, duke përmendur sidomos Nigerinë, e pastaj
edhe konfliktet e shumta me karakter civil, që trondisin Afrikën, duke nisur nga
Libia, për të vijuar me situatën dramatike në Republikën Qendrafrikane, Sudanin, Bririn
e Afrikës, Republikën Demokratike të Kongos, për të cilat Françesku kërkoi angazhimin
e qeverive vendase e të bashkësisë ndërkombëtare. Foli edhe për dhunimet, që shoqërojë
luftërat, kujtoi sëmundjet dhe epidemitë, nga lebra, te ebola. Një nga paragrafet
më të rëndësishme, ishte ai, kushtuar refugjatëve e të shpërngulurve, njerëz që humbasin
jetën në shtegtime çnjerëzore, që i nënshtrohen angarive të urryera nga ana e skllavopronarëve
modernë, të cilët nuk ngopen kurrë me para! Një gisht mbi plagët e botës! Një
gisht i dridhshëm, ai i Papës, preku sot të gjitha plagët e hapura të botës, duke
treguar edhe rrugën që duhet ndjekur për t’i shëruar. Fjalimi përfundoi me një citim
nga Pali VI, shqiptuar në OKB, më 1965: “Kurrë më luftë! Kurrë më! Paqja, paqja duhet
t’u prijë fateve të popujve dhe të mbarë njerëzimit!”.