Papa Françesku mbledh një konferencë për Haitin, pesë vjet pas tërmetit
Dje, u mbajt në Vatikan, një konferencë për Haitin me temë “Bashkimi në Kishë: kujtime
e shpresa për Haitin, pesë vjet pas tërmetit”. I organizuar nga Këshilli Papnor “Cor
Unum”, nga Komisioni Papnor për Amerikën Latine, në bashkëpunim me ipeshkvijtë e Haitit,
takimi u zhvillua me dëshirën e Papës Françesku, me qëllim tërheqjen e vëmendjes botërore
ndaj gjendjes në të cilën ndodhet akoma vendi e populli haitian, pavarësisht nga ndihmat
e projektet e realizuara që nga viti 2010 deri më sot. Pikërisht bilanci i këtyre
projekteve u bë dje nga përfaqësuesit e Selisë së Shenjtë, të Kishës Katolike vendase,
të disa Konferencave ipeshkvnore, të disa organizmave katolike e kongregatave rregulltare,
me pjesëmarrjen e diplomatëve të akredituar pranë Vatikanit. Në orën 9.00, pas
përshëndetjes së kryetarit të Komisionit Papnor për Amerikën Latine, kardinalit Marc
Ouellet e pas relacionit të ish-kryetarit të “Cor Unum”, kardinalit Robert Sarah,
pjesa e parë e konferencës iu kushtua procesit të rindërtimit material e shpirtëror
të Haitit. Folën kryesisht protagonistë të Kishës Katolike lokale dhe të organizatave
humanitare, që punojnë në vend. Në orën 11.30, pjesëmarrësit u pritën nga Papa Françesku
në Sallën Klementine të Pallatit Apostolik. Pasdite, të pranishmit dëgjuan dëshmi
të ndryshme nga veprimtarët ndërkombëtarë, që po merren me rindërtimin e vendit pas
tërmetit. U diskutuan gjithashtu, përparësitë e kriteret e ndërhyrjeve të ardhshme.
Në përfundim të punimeve, sekretari i Këshillit Papnor “Cor Unum”, imzot Giampietro
Dal Toso, sintetizoi problematikat aktuale të Haitit dhe fushat e veprimit në të ardhmen.
Në orën 18.30, në kishën e Shën Marisë në Transpontinë, Sekretari i Shtetit, kardinali
Pietro Parolin kryesoi kremtimin eukaristik, që mbylli ditën kushtuar Haitit. Kujtojmë
se në janar 2010, ishulli i Haitit pësoi dëme të jashtëzakonshme nga tërmeti me qendër
në afërsi të kryeqytetit Port-au-Prince. Ai shkaktoi rreth 230 mijë viktima. Sipas
vlerësimit të Kryqit të Kuq Ndërkombëtar dhe të Kombeve të Bashkuara, rreth 3 milion
vetë u dëmtuan rëndë. Tërmeti shkatërroi një pjesë të madhe të infrastrukturës, mijëra
banesa si edhe të gjitha spitalet e ishullit.