Pagëzimi Krishtit na flet për shkëmbim mahnitës ndërmjet hyjnores e njerëzores
Pagëzimi Jezu Krishtit na flet për atë shkëmbim mahnitës e të madhërishëm ndërmjet
hyjnores e njerëzores. Kështume Festën e sotme të
Pagëzimit të Zotit tonë Jezu Krishtit, mbyllet periudha e festave që lidhen me fundin
e një viti e me fillimin e një viti të ri. Fjala e Zotit na kërkoi si besimtarë
ta njohim në ngjarjen e Lindjes së Krishtit shenjën e shpëtimit të njeriut, të shenjtërisë
së familjes e të paqes për botën e njerëzimin. Të përhapen në mbarë botën drita
dhe gëzimi i Jezu Krishtit: kjo është porosia, që Kisha u drejton besimtarëve e të
gjithë njerëzve vullnetmirë.
Krishtlindja kremton faktin historik të lindjes
së Jezusit në Betlehem, kujtoi Papa, e është festa në të cilën Zoti i dëfton njeriut
dinjitetin e tij më të thellë, dinjitetin e Birit të Hyjit.
Nga njëra anë fshehja
e Hyjit pas përvujtërisë së natyrës njerëzore, në Foshnjën e Betlehemit; nga ana tjetër,
dëftimi përmes mishërimit: dy realitete, që i shohim qartë në dy solemnitete: atë
të Krishtlindjes e atë të Dëftimit të Zotit. Festa e Dëftimit të Zotit, që kremtojmë
më 6 janar, na kujton adhurimin e tre Mbretërve Dijetarë, e, me që është dëftim, edhe
Pagëzimin e Jezusit dhe Dasmën e Kanës. Mund të theksojmë dy aspekte, të dy festave
të mëdha: gëzimin e dritën. Gëzim e mahnitje burojnë vetvetiu nga kundrimi i fytyrës
së kësaj Foshnjeje të përvuajtur, sepse e dimë që është Fytyra e Hyjit, e pranishme
përgjithmonë në zemrën e njerëzimit; fytyra e Zotit të ardhur për ne, që jeton me
ne. Krishtlindja është gëzim, sepse, më në fund, shikojmë me sytë tanë e jemi të
sigurt se Zoti është e mira e pambaruar, se është e vërteta, që ulet tek njeriu, për
ta lartuar kah Vetja: Hyji bëhet, kështu, i afërt, që të mund ta shikojmë e ta prekim. Teologjia
dhe përshpirtëria e Krishtlindjes flasin për një shkëmbin mahnitës ndërmjet natyrës
hyjnore e asaj njerëzore: Hyji bëhet njeri, merr natyrën tonë, lind si ne, duke i
dëftuar, kështu, njeriut, dinjitetin e tij më të thellë: atë të birit të Zotit. E
kështu ëndrra e njerëzimit, nisur në Parajsë – duam të jemi si Zoti – realizohet në
një mënyrë krejt të papritur, jo për shkak të madhështisë së njeriut, që nuk mund
të bëhet Zot, por për shkak të përvujtërisë së Zotit, që zbret nga qielli e hyn në
ne, me përvujtërinë e vet e na larton në madhështinë e vërtetë të qenies së Vet. Është
një shkëmbim, tejet i prekshëm në Eukaristi. Ftesa e Izaisë profet: “Ngrehu, shkëlqe,
se po vjen drita jote; në dritën tënde do të ecin popujt, e mbretërit, në vezullimin
e shkëlqimit tënd”…”, i drejtohet Kishës, por edhe secilit nga ne, e këtë nuk duhet
ta harrojmë. E është ftesë për t’u bërë gjithnjë më të vetëdijshëm në misionin për
ta përhapur dritën e re të Ungjillit. Pra, Ungjilli është dritë, që nuk duhet fshehur.
Duhet vënë lart e më lart. Kisha nuk është dritë, por merr dritën e Krishtit. E merr,
për të qenë e ndriçuar e për ta përhapur, me gjithë shkëlqimin e saj. E kjo duhet
të ndodhë edhe në jetën tonë personale. Edhe sot, drita e Krishtit e davarit errësirën
e botës, këtë na kujton Fjala e Zotit. Të kremtosh Krishtlindjen do të thotë t’u tregosh
të gjithëve gëzimin, risinë, dritën, që solli kjo Lindje Hyjnore në të gjithë jetën
tonë, për të na bërë njerëz, që përhapin në botë gëzimin, risinë e vërtetë, dritën
e Zotit, duke ua dhuruar edhe të tjerëve. Porosia kryesore e Kishës në këtë periudhë
liturgjike e shpirtërore është ta kumtojmë Ungjillin e ta pranojmë në zemrat tona
këtë Foshnjë Hyjnore, për të marrë jetë, nga jeta e Tij, për t’i bërë ndjenjat, mendimet,
veprimet e Tij, ndjenjat, mendimet, veprimet tona.
Edhe pas mase dymijë vjetësh,
qendra e rrezatimit të paqes që kërkon njerëzimi, qendra e shpëtimin nga e keqja me
të gjitha aspektet e saj, nuk është zhvendosur nga Nata e Betlehemit. “Shpëtimtari
i të gjithëve” edhe një herë ka fytyrën e një foshnjeje, ka forcën e tij të brishtë,
të një nënë e të një babë shembull për çdo familje, megjithëse sot modelet që po përhapen
janë të tjera. Zemra e Liturgjisë është Zoti-Fëmijë që rrezaton të gjitha këto aspekte
të jetës njerëzore. Në kremtimin e Natës së Krishtlindjes, më 24 dhjetorin e kaluar,
Fjala e Zotit theksoi se Zoti nuk vjen me pushtet e madhështi të jashtme. Ai vjen
si fëmijë i pambrojtur, që ka nevojë për ndihmën tonë. Nuk do të na mposhtë me forcë.
Na e heq frikën nga madhështia e tij. Ai na kërkon vetëm dashuri: për këtë bëhet fëmijë.
Asgjë tjetër nuk do prej nesh, përveçse dashurinë, nëpërmjet së cilës mësojmë se si
të hyjmë në ndjenjat e tij, në mendimet dhe vullnetin e tij – mësojmë të jetojmë me
Të dhe të vëmë në jetë së bashku me Të edhe përvujtërinë e heqjes dorë nga disa gjëra,
përvojë që është thelbi i dashurisë. Pyesim: a është akoma i nevojshëm një “Shpëtimtar”
për njeriun që ka arritur në Hënë e në Mars e bëhet gati të pushtojë universin?, për
njeriun që ka arritur të deshifrojë edhe kodet e mrekullueshme të ADN-së njerëzore,
që lundron në oqeanin virtual të internetit dhe e ka kthyer Tokën, këtë shtëpi të
madhe të përbashkët në një fshat global?. Përgjigjja është “po”, sepse pa Shpëtimtarin
dhe mesazhin e tij universal të dashurisë, planeti mbetet në mjerim. Akoma ka njerëz
që vdesin nga urrejtja e dhuna, nga uria e etja, nga sëmundjet e varfëria në këtë
kohë bollëku e konsumizmi të shfrenuar. Akoma ka njerëz skllevër, të shfrytëzuar e
të ofenduar në dinjitetin e tyre; ka njerëz viktima të urrejtjes raciale e fetare…
Ka njerëz që e shohin veten e të afërmit e tyre, sidomos fëmijët, të martirizuar
nga armët, nga terrorizmi e nga çdo lloj dhune në një epokë, në të cilën të gjithë
njerëzit kërkojnë e shpallin përparimin, solidaritetin e paqen për të gjithë. Të
gjithë janë të thirrur që t’i kthejnë sytë nga Krishti, pa pasur frikë prej Tij. Pse
Krishti është dritë, e drita nuk mund të errësojë, por vetëm të ndriçojë. E duke filluar
nga Krishti, mund të vijë ai humanizëm i ri për të cilin ka nevojë bota e secili prej
nesh. Shohim gjithnjë e më qartë se një rend i ri botëror ekonomik e politik nuk
funksionon nëse nuk ka përtëritje shpirtërore, nëse nuk i afrohemi sërish Zotit e
gjejmë Zotin mes nesh... Shohim gjithnjë e më tepër se nuk mund të krijojmë vetëm,
nuk mund të gjejmë drejtësi e paqe, përveçse nën dritën e Zotit që na tregon fytyrën
e Tij, që na shfaqet në grazhdin e Betlehemit e na shfaqet edhe në kryq.Krishti
është shpëtimi i njeriut, shenjtëria e familjes dhe paqja për botën. Urojmë pra edhe
një herë të gjithëve që Krishti, me dritën e Tij Hyjnore, të vijon të shkëlqejë e
të përhapë gëzim në të katër anët. Edhe një herë, urime për një kohë shpirtërore
të bekuar nga prania e Zotit.