Գարեգին Բ. Ամենայն Հայոց Կաթողիկոսի Ս. Ծննդեան եւ Աստուածայայտնութեան տօնի պատգամը

Յանուն Հօր եւ Որդւոյ եւ Հոգւոյն Սրբոյ. ամէն:
«Որ ի հրեղէն աթոռ ընդ Հօր ես բնակեալ եւ ի հրեշտակաց սպասաւորեալ, այսօր կամով Հօր ի յերկրի երեւեցար մարմնով կուսական ծննդեամբ, զքեզ ընդ զորս անմարմնոցն անդադար օրհնաբանեմք»(Շարական Ս. Ծննդեան):
Սիրելի բարեպաշտ ժողովուրդ,
Շարականագրի աղօթամատոյց այս օրհներգով բերում ենք ձեզ մեր Տիրոջ եւ Փրկչի Սուրբ Ծննդեան եւ Աստուածյայտնութեան սքանչելի աւետիսը:
Երկնային բարձունքներում Ա-մենակալ Հօրն աթոռակից եւ հրեշտակներից սպասաւորեալ Աստուծոյ Որդին մարմնացաւ եւ աշխարհ եկաւ, որպէսզի ընդունենք փրկութեան յոյսն ու շնորհը եւ միշտ նորոգուող կեանքը, որ Փրկիչ մեր Տէրն է պարգեւում: Բեթղեհէմում ծնուած Մանուկը նոր սիրտ ու հոգի է բերում աշխարհին՝ ճանաչելու Աստուծոյ սէրը մարդկանց հանդէպ եւ այն դարձնելու արդարութիւն, խաղաղութիւն ու սէր միմեանց հանդէպ: Բերում է զօրութիւնը՝ փարատելու անյուսութեան խաւարները եւ երկրի վրայ հաստատելու սիրով լի այն կեանքը, որն ունի յաւիտենական կեանքի աւետիսը:
Սուրբ Ծննդեան աւետարանական պատումը մարդկութեան կեանքում Աստուծոյ ներկայութեան մեծ խորհուրդն է պատկերում: Բեթղեհէմի քարայրը նախատիպն է Սուրբ Եկեղեցու, հասարակ հովիւները եւ իմաստուն մոգերը աստուածպաշտութեան համար մէկտեղուած հաւատացեալներն են, իսկ մատուցուած ընծաները՝ առ Աստուած հաւատքով ապրուած բարի ու երկնահաճոյ կեանքն ու գործերը: Բեթղեհէմեան երկնակամարում Տիրոջ փառքի ծագումը, եւ լուսափայլ հրեշտակների հնչեցրած պատգամը երկնային հրաւէրն է աշխարհին՝ խաղաղութեան ու մարդկանց մէջ սիրոյ եւ հաճութեան, որոնց այսօր էլ փափաքում է նեղութիւններով ու մարտահրաւէրներով բեռնաւորուած աստուածաստեղծ օրրանը մարդկութեան:
Նիւթատեխնիկական մեծ ձեռքբերումներ արձանագրած, գիտական բարձունքներ նուաճած ներկայ աշխարհում չեն դադարում կեանքի խաղաղութիւնն ու բարօրութիւնը խաթարող տագնապներն ու ցնցումները: Քաղաքական հակամարտութիւնները, ռազմական բախումները, խորացող ֆինանսական, տնտեսական ճգնաժամերը բերում են աւեր, վիշտ ու տառապանք, կարիքի եւ անապահովութեան նոր խնդիրներ: Մարդկային ըմբռնումներում խեղաթիւրւում են աստուածադիր հիմնարար սկզբունքները՝ մարդը չի ընկալւում որպէս Աստուծոյ պատկերով եւ նմանութեամբ ստեղծուած, կեանքը՝ որպէս երկնաշնորհ գերագոյն պարգեւ եւ մերձաւորի հանդէպ սէրը՝ որպէս աստուածնմանութիւն: Այս իրավիճակները եւ մտածողութեան այսպիսի աղաւաղումները հեռացնում են մարդուն հոգեւորից, առաջնորդելով աստուածամերժ ընթացքների՝ մարդու եւ ազգերի իրաւունքների ոտնահարման, ընտանիքի գաղափարի, բարոյական արժէքների աղճատման:
Հակառակ Աստուածային կամքին մարդու հակոտնեայ ընթացքների՝ մարդեղութեան մեծ խորհրդով Տէրը ցոյց տուեց, որ Իր անսահման սիրոյ ու խնամքի մէջ է աստուածաստեղծ մարդը, եւ երկրային գոյութիւնը բաժանուած չէ յաւիտենութիւնից, իսկ մարդկութեան պատմութիւնը՝ Աստուծոյ ներկայութիւնից: «Ահա Ես ձեզ հետ եմ բոլոր օրերում՝ մինչեւ աշխարհի վախճանը» (Մատթ. ԻԸ. 20), ասում է Փրկիչ մեր Տէրը: Մարդկային կեանքում Փրկչի մշտական ներկայութիւնը նոր իմաստ է պարգեւում, բարձր ու վեհ բովանդակութիւն հաղորդում մարդու եւ աշխարհի ընկալմանը՝ բերելով մարդկանց Աստուծոյ ժողովուրդ լինելու գիտակցութիւնն ու պատասխանատուութիւնը եւ հրաւէրը՝ մնալու եւ յարատեւելու «սիրեցէք միմեանց» Տիրոջ նոր պատուիրանի մէջ (Յովհ. ԺԳ. 34): Մերձաւորի հանդէպ սէրը վեհացնում եւ արժեւորում է մարդուն եւ նրա գործերը, պահում աստուածնմանութեան շնորհի մէջ եւ հանրութեան կեանքը հաստատում բարու մէջ: Միմեանց հանդէպ սիրով առաջնորդուող հասարակութիւնը կարող է բխեցնել կեանքը ոռոգող հոգեւոր ներուժի անսպառ աղբիւրներ, լինել ճշմարտապէս արդարամիտ եւ իրաւադատ, կարեկից ու ողորմած: Տէրունապատուէր այս ուղիով մարդկութիւնը կարող է ձերբազատուել աղէտաբեր իրավիճակներից եւ հոգսերից, դիմակայել նեղութիւններին, արդարութեամբ հարթել հակառակութիւնները եւ համերաշխ գոյակցութեամբ կերտել նոր օրը մարդկութեան կեանքի:

Սիրելի բարեպաշտ ժողովուրդ, Սուրբ Ծննդեան օրհներգին ու փառաբանութեանը այսօր միախառնուում են մեր սրտաբուխ աղօթքները յանուն Հայոց Ցեղասպանութեան մեր անմեղ նահատակների, ովքեր չուրացան Փրկչին, իրենց ինքնութիւնն ու սուրբ հաւատքը: Եղեռնի դառնաղէտ տարիների ամենադաժան փորձութեանց մէջ անգամ չլռեց Փրկչին ուղղուած՝ մեր ժողովրդի հոգու օրհներգը: Մեր Տիրոջ հետ գտանք ոգին եւ ուժը վերածննդի, պետականութիւն կերտեցինք, ազգային մեր կեանքը բարձրացրինք, մեր իրաւունքների համար պայքարեցինք հաւատով, որ արդարութեան եւ ճշմարտութեան ուղիները պիտի կերտեն բռնութիւնից զերծ, մարդասէր ու խաղաղ աշխարհ:
Հայոց Ցեղասպանութեան ոճրից 100 տարի անց նոյն հաւատով ու վստահութեամբ շարունակում ենք մեր պայքարը՝ յանուն մեր արդար դատի, մեր խաղաղ կեանքի՝ չդադարող շրջափակման եւ պատերազմի վերսկսման պայմաններում: Այսօր մեր կեանքում առկայ բազմաթիւ հրամայականների ու խնդիրների առջեւ, սիրելիներ, առաւել ջանք ու նուիրում ներդնենք, յանձն առնենք հայրենաշէն ու ազգաշէն ծրագրեր ու գործեր՝ ի սէր մեր ժողովրդի բարօրութեան, մեր երկրի հզօրութեան, մեր իղձերի իրականացման: Մեր կեանքը ապրենք հայրենեաց աւանդներով, հաւատարիմ քրիստոնէական մեր արժէքներին, նիւթապաշտութեանը դիմակայելով աստուածպաշտութեամբ, շահամոլութեան դէմ դնելով Տիրոջ կողմից գովաբանուած ողորմութիւնը (Մատթ. Է. 7), ուժի եւ ստիպողականութեան փոխարէն՝ քրիստոսապատուէր սէրը (Յովհ. ԺԳ. 34-35), եսասիրութեան եւ շահագործման փոխարէն՝ բարի սամարացու նման կարիքաւորին օգնելը (Ղուկ. Ժ. 30-37), եղբայրատեացութեան փոխարէն՝ առաքեալի յորդորած եղբայրասիրութիւնը (Հռոմ. ԺԲ. 10) եւ մեր մեծերի օրինակով՝ «ես»ի փոխարէն՝ «ազգ»ը: Բարգաւաճենք եւ զօրանանք ընտանիքներում նոր զաւակների ծնունդով, ազգանուիրումի, հայրենասիրութեան նոր վկայութիւններով՝ մեր ազատ երկրից, Սփիւռքի եզերքներից, վերականգնուած եւ նորակառոյց մեր եկեղեցիներից, հանուր հայ կեանքից երկինք բարձրացնելով մեր հայրերի օրհներգը. «Զքեզ ընդ զորս անմարմնոցն անդադար օրհնաբանեմք»:
Սուրբ Ծննդեան խնդագին աւետիսով ողջոյն ենք յղում Առաքելական մեր Սուրբ Եկեղեցու Նուիրապետական Աթոռների գահակալներին՝ ՆՍՕՏՏ Արամ Ա. Մեծի Տանն Կիլիկիոյ կաթողիկոսին, Երուսաղէմի Հայոց պատրիարք Ամենապատիւ Տ. Նուրհան արքեպիսկոպոս Մանուկեանին, Կոստանդնուպոլսի Հայոց պատրիարք Ամենապատիւ Տ. Մեսրոպ արքեպիսկոպոս Մութաֆեանին եւ մեր Եկեղեցու ուխտապահ ողջ հոգեւոր դասին՝ մաղթելով Տիրոջ զօրակցութիւնն իրենց առաքելութեանը՝ ի զօրացում մեր ժողովրդի հոգեւոր կեանքի եւ ի պայծառութիւն մեր Սուրբ Եկեղեցու:
Ողջունում ենք Քոյր Եկեղեցիների հոգեւոր Պետերին՝ Փրկչի ամենաառատ շնորհները հայցելով իրենց եւ իրենց հաւատաւոր հօտին:
Հայրապետական օրհնութեամբ Մեր բարեմաղթանքներն ու ողջոյնն ենք բերում Սուրբ պատարագի արարողութեանը ներկայ Հայաստանի Հանրապետութեան նախագահ տիար Սերժ Սարգսեանին եւ Առաջին տիկնոջը, ողջոյն ենք յղում Լեռնային Ղարաբաղի Հանրապետութեան նախագահ տիար Բակօ Սահակեանին, հայոց պետական աւագանուն՝ աղօթքով, որ Տիրոջ օրհնութեամբ արգասաւորուեն մեր երկրի եւ ժողովրդի խաղաղութեանն ու բարօրութեանը եւ մեր ժողովրդի իրաւունքների պաշտպանութեանն ուղղուած նրանց ջանքերը:
Մեր ողջոյնն ու բարեմաղթանքներն ենք բերում Հայաստանում հաւատարմագրուած դիւանագիտական առաքելութիւնների ներկայացուցիչներին՝ մաղթելով արգասաբեր գործունէութիւն՝ ի նպաստ մեր ժողովուրդների բարեկամութեան ու համագործակցութեան եւ տարածաշրջանում կայունութեան ու խաղաղութեան ամրապնդման:
Սուրբ Ծննդեան ողջունաբեր աւետիսով Հայրապետական Մեր օրհութիւնն ենք բերում համայն մեր ժողովրդին՝ մաղթանքով, որ ջերմ սիրով սրտում պահպանի Տիրոջն ուղղուած օրհներգը եւ մնայ Բարձրեալի ամենախնամ Աջի հովանու ներքոյ, հաւատարիմ՝ վերազարթօնքի իր տեսիլքներին եւ լաւատես, որ երկնային արդարութեան լոյսով պիտի բացուի իր հանդէպ արդարութիւնը վերականգնելու օրհնեալ օրը:
Աղօթք ենք բարձրացնում, որ Փրկիչ մեր Տիրոջ շնորհները սփռուեն մարդկանց սրտերում՝ խաղաղութիւն, համերաշխութիւն, ապահով առաջընթաց բերելով աշխարհին: Թող մարդացեալ մեր Տէրը՝ Յիսուս Քրիստոս, ամէն ժամ օրհնի եւ առաջնորդի մեր կեանքը, խաղաղ, հաւատքով ամուր, սիրով ու միասնական պահպանի մեր ժողովրդին՝ այսօր եւ միշտ փառաբանելու Իր Սուրբ Անունը՝ Հօր եւ Սուրբ Հոգու հետ. ամէն:
Քրիստոս ծնաւ եւ յայտնեցաւ՝ ձեզ եւ մեզ մեծ աւետիս։
Սուրբ Էջմիածին
6 Յունուարի, 2015թ.