Францішак да французскіх імамаў: супольна служыць міру, братэрству і праўдзе
Пантыфік сардэчна
прывітаў дэлегацыю французскіх імамаў, якія з 6 студзеня 2015 г. знаходзяцца з візітам
у Рыме. Яны ўдзельнічаюць у трохдзённай мусульманска-каталіцкай канферэнцыі пад назвай
“Хрысціянска-мусульманскі дыялог у Францыі”. 7 студзеня 2015 г. падчас агульнай аўдыенцыі
ў Ватыкане, на якой прысутнічалі прадстаўнікі ісламу, Папа пажадаў удзельнікам форуму,
асабліва ў час Божага Нараджэння, “працягваць з мужнасцю супольныя намаганні на службе
міру, братэрству і праўдзе”. У рамках форума прадугледжана сустрэча ісламскага духавенства
са студэнтамі каталіцкай і ісламскай тэалогіі. Запланавана таксама іх спатканне са
старшынёй Папскай рады па міжрэлігійным дыялогу, французскім кардыналам Жан-Луі Таранам.
Таксама падчас агульнай аўдыенцыі Францішак сардэчна прывітаў дэлегацыю былых польскіх
вязняў канцэнтрацыйнага лагера “Аўшвіц”, вызваленне якога адбылося 70 гадоў таму.
Іх суправаджалі былыя зняволеныя нацысцкіх лагераў з Францыі, Германіі і Чэхіі. Пантыфік
атрымаў з іх рук статуэтку “Дар памяці” Міжнароднага асвенцымскага камітэту. У аўдыенцыі
прынялі ўдзел таксама прадстаўнікі Міжнароднага дома сустрэч моладзі ў Асвенцыме і
маладыя навучэнцы пры канцэрне “Volkswagen”.
Канцэнтрацыйны лагер “Аўшвіц”
быў вызвалены 27 студзеня 1945 г. савецкімі войскамі. Ён стаў для ўсіх сімвалам тэрору,
генацыду і Халакоста. Менш чым за пяць гадоў існавання “Аўшвіца” ад рук нацыстаў тут
загінула ад 1 да 1,5 млн. чалавек.