Thirrje e ipeshkvijve të Sri Lankës: mos e politizoni vizitën e Papës
Ipeshkvijtë e Sri Lankës bëjnë thirrje për të mos e politizuar vizitën e Papës Françesku,
i cili do të shkojë në vendin aziatik nga 12 deri më 15 janar, pikërisht pas zgjedhjeve
presidenciale, që mbahen nesër. Mesazhi nënshkruhet nga kreu i Konferencës Ipeshkvnore,
kardinali Malcolm Ranjith. Gjithsesi, pavarësisht se kush e fiton garën për presidencën
nga dy kandidatët e paraqitur, presidenti aktual, Mahinda Rajapaksa do të qëndrojë
në detyrë deri në vitin 2016, sipas Kushtetutës. Shqetësimet e Kishës Në
këtë kuadër, shqetësimi kryesor i Kishës së vendit është të mos instrumentalizohet
vizita e Atit të Shenjtë. “U kërkojmë me forcë kandidatëve – shkruajnë ipeshkvijtë
– një atmosferë paqësore për vizitën papnore, në mënyrë që programi shpirtëror i parashikuar
të ndiqet rregullisht… Në çdo nivel, duhet shmangur dhuna, si para, ashtu edhe pas
zgjedhjeve, që, së bashku me popullsinë, të zhvillohet një debat i matur për politikën
e çdo partie”. Të ruhen parimet e demokracisë e të transparencës Më
pas, Konferenca Ipeshkvnore e Sri Lankës bën thirrje të “ruhen parimet e demokracisë
e të transparencës absolute për zhvillimin e zgjedhjeve të lira e korrekte”. Ipeshkvijtë
kërkojnë liri e atmosferë demokracie, ku mbretëron shteti i së drejtës. Gjithashtu,
Kisha pret që politikanët të angazhohen më seriozisht për vendosjen e paqes e të pajtimit
në vend, duke u siguruar të gjithë qytetarëve të drejta të barabarta. Votë
për të mirën e përbashkët Mesazhi ipeshkvnor vë në dukje të drejtën e çdo
qytetari për të votuar pa frikë, në një atmosferë drejtësie e transparence. “Kisha
– lexohet në tekst – ka mbështetur gjithnjë nevojën për të respektuar të drejtën dhe
detyrën për ta përdorur votën në favor të së mirës së përbashkët”, prandaj pjesëmarrja
në zgjedhje nuk është vetëm e drejtë, por edhe detyrë. Ipeshkvijtë urojnë që kandidati
jo fitimtar të pranojë vendimin e popullit e të bashkëpunojë me fitimtarin që Sri
Lanka, e lirë nga dhuna, të ecë në rrugën e lirisë e të mirëqënies, duke ruajtur parimet
e shëndosha ekonomike, morale dhe kulturore, shumë të çmuara për popullsinë.