Vijojnë përgatitjet për kongresin e pestë të krerëve të feve botërore tradicionale,
në program qershorin e ardhshëm në Astana të Kazakistanit. Nisma pati lindur në Vatikan,
gjatë vizitës së presidentit të Republikës kazake, Nursultan Nazarbayev, në kohën
e Papës Gjon Pali II. Presidenti pati kërkuar mbështetjen e Selisë së Shenjtë që vendi
i tij – i pasur me fe, etni e kultura të ndryshme - të bëhej promovues i dialogut
ndërmjet feve. Natyrisht, kërkesa u pranua menjëherë e pas fjalëve, faktet. Në Kazakistan
u dërgua kreu i zyrës për Islamin në Këshillin Papnor për Dialogun Ndëfetar, që vuri
bazat e Kongreseve të para. Aktuali, Khaled Akasheh, shpjegon përgatitjet për Kongresin
e pestë, nga faqet e gazetës vatikanase “L’Osservatore Romano”. Në shtator, në
Astana, u mblodh sekretariati i Kongresit dhe grupi i punës, me përfaqësues nga fetë
e mëdha të botës: hebraizmi, krishterimi, islamizmi, hinduizmi e budizmi. U vendos
që tema e Kongresit të jetë “Dialogu i krerëve fetarë dhe i politikanëve për paqen
e zhvillimin”. Në këtë kuadër, do të diskutohet për qëndrimin e politikanëve ndaj
fesë; për përgjegjësinë e fesë dhe të politikës ndaj njeriut; për ndikimin e fesë
mbi rininë, përmes edukimit, shkencës, kulturës e mediave, duke diskutuar mbi prirjet
e perspektivat e reja; për dialogun e bazuar mbi respektin e ndërsjellë e mbi mirëkuptimin
ndërmjet feve e ndjekësve të tyre për paqen, sigurinë e harmoninë. Grupi i punës do
të mblidhet sërish më 8 qershor, sekretariati një ditë më pas, ndërsa Kongresi do
të mbahet më 10 e 11 qershor. Në mbledhjen e sekretariatit, u fol edhe për gjendjen
e të krishterëve në Irak e Siri. U pranua menjëherë propozimi i mitropolitit të Francës,
Emanuel për një deklaratë të përbashkët, me anë të së cilës pjesëmarrësit “i bëjnë
thirrje bashkësisë ndërkombëtare të dënojë fuqishëm ekstremizmin, radikalizmin, dhunën
dhe terrorizmin, duke i denoncuar si të pamoralshëm dhe kriminelë”. Gjithashtu, të
gjitha fetë monoteiste njëzëri pohuan se aktet terroriste nuk mund të justifikohen
nga asnjë fe apo besim fetar. Respekti i lirisë fetare, përfunduan përfaqësuesit e
feve, ka përpara një sfidë të rëndësishme: atë të garantimit të sigurisë së territorit
e të qytetarëve. Natyrisht, një ekuilibër jo i lehtë në skenarin e trazuar botëror.