Papa në lutjen e Engjëllit të Tënzot: paqja, gjithnjë e mundur, lutja është rrënja
e saj
“Në këtë ditë të parë të vitit, në atmosferën gazmore të Krishtlindjes, Kisha
na fton t’ia ngulim sytë Nënës së Jezusit”. Paqja është gjithnjë e mundur e rrënja
e saj është lutja. Këtë pohoi Papa Françesku në lutjen e sotme të Engjëllit të Tënzot,
duke shtuar se në fillim të një viti të ri, na bën mirë të kujtojmë edhe ditën e Pagëzimit
tonë. Pagëzimi, tha Papa, duke i ftuar besimtarët ta kujtojnë ditën kur u pagëzuan,
na sharton si gjymtyrë të gjalla të Krishtit e na bën pjesë të pandarë të Kishës së
tij. Falë pagëzimit, shpjegoi, hyjmë në bashkim me Hyjin e nuk jemi më në mëshirën
e së keqes e të mëkatit. E, më pas, duke parë afishet kushtuar paqes në Sheshin e
Shën Pjetrit, Papa tha: Paqja është gjithnjë e mundur! “Kjo afërsi e
Hyjit me jetën tonë na jep paqen e vërtetë: paqen, dhuratën hyjnore, për të cilën
duam të lutemi posaçërisht sot, në Ditën Botërore të Paqes. Unë lexoj atje “Paqja
është gjithnjë e mundur!”. Gjithnji e mundur është paqja. Duhet ta kërkojmë. Në rrënjët
e saj është lutja. Lutja bën të mungullojë paqja. Sot kremtojmë Ditën Botërore të
Paqes me temë: “Kurrë më skllevër, por vëllezër”. E ky është mesazhi i kësaj dite.
Sepse luftërat bëjnë skllevër gjithnjë! Mesazh, ky, që na përket të gjithëve! Ati
i Shenjtë , në vijim i ftoi të gjithë ta mbrojnë paqen. Ftesë për paqen “Të
gjithë jemi të thirrur të luftojmë kundër çdo forme të skllavërisë e të jetojmë si
vëllezër. Të gjithë, secili sipas përgjegjësisë së vet. E, kujtojeni mirë: paqja është
e mundur! Në rrënjë të paqes është gjithnjë lutja. Të lutemi për paqen. Të mësojmë
në shkollën e paqes e të shkojmë përpara me edukimin për paqen. Hiri fiton mbi
mendësinë legalistike Krishti, shtoi, mori korp njerëzor, duke na çliruar nga
mendësia e mbyllur legalistike. Ligji, pa hir, bëhet zgjedhë e padurueshme e, në
vend që të na bëjë mirë, na bën keq. Jezusi thoshte: e shtuna u bë për njeriun e jo
njeriu për të shtunën. Ja, pra, pse Hyji dërgoi Birin e vet mbi tokë për t’u bërë
njeri: për të na çliruar, madje për të na rilindur. Për të çliruar ata, që ishin
nën ligj e për t’i shpërblyer me vdekjen e Krishtit mbi kryq.
Pas lutjes së
Engjëllit të Tënzot, Papa kujtoi posaçërisht marshimin kombëtar, organizuar dje në
Vicenza si dhe manifestimin “Paqe në të gjitha tokat” promovuar në Romë e në disa
qytete të tjera të botës. Këmbana e paqes Pastaj, falë lidhjes me Revereton,
në Trentino, në Sheshin e Shën Pjetrit kumboi këmbana, që njihet me emrin “Maria Dolens”,
realizuar me bronzin e armëve të Luftës I Botërore, për kujtim të të rënëve të të
gjitha luftërave, bekuar nga i Lumi Pali VI, në vitin 1965. “Qoftë urim, që të
mos ketë kurrë më luftëra, kurrë më, por të ketë gjithnjë dëshirë e angazhim për paqen
e vëllazërinë ndërmjet popujve”. Gëzuar Vitin e Ri të gjithëve! Qoftë vit i
paqes, i paqes! Në krahët plot me dashuri të Hyjit e nën mbrojtjen e Marisë, Nënës
së Zotit e Nënës sonë!