Imzot Dodë Gjergji: kemi shumë nevojë për Zotin, për të përmirësuar realitetin tonë
Kremtimi i Krishtlindjes në Kosovë Drita e gëzueshme e Hyjit zbriti në tokë,
e në zemrat tona lindi Foshnja Hyjnore, Krishti Fëmijë. Ai lindi në Kosovë për ti
dhënë shëlbimin popullit të këtij vendi, një rreze shprese, paqeje e dashurie mes
njerëzve pa dallim besimi. Një dëshmi e gjallë ishte ajo në rezidencën e ipeshkvit
të Kosovës, pritja solemne të Imzot Dodë Gjergjit me rastin e kësaj feste. Erdhën
për të përgëzuar, Presidentja e Vendit Atifete Jahjaga, kryeministri Isa Mustafa,
deputetë, e të shumë të tjerë. Atmosferë madhështore ishte në Mesnatë të Shenjtë të
Krishtlindjes në Katedralen ‘Nënë Tereza’ e cila ishte plotë e për plotë e mbushur
me besimtarë e qytetarë tjerë, përfshirë edhe ndërkombëtarë e bashkatdhetarë të ardhur
për festat e fundvitit, e natyrisht edhe meshtarë e motra rregulltare. Meshën solemne
të Mesnatës së Krishtlindje, e drejtoi imzot Dodë Gjergji në bashkëmeshim me një numër
të madh meshtarësh. Në homelinë e tij të rastit veç që foli për historikun e Krishtlindjes,
ipeshkvi ktheu vëmendjen edhe në realitetin aktual. “Kur e prekim realitetin që
e jetojmë, atëherë forcohemi në fe dhe e kuptojmë se kemi edhe më shumë nevojë për
Zotin, sepse edhe pas një çerekshekulli përpjekjesh për jetë më të mirë, disi të
gjithëve na ka kapluar një fije zhgënjimi, e shumëkënd edhe dëshpërimi. Dëgjojmë për
ngatërresa familjare, padrejtësi sociale, konflikte të ndryshme, vetëvrasje, ikje
masive e të rinjve nga vendi, e gjëra tjera që shkurajojnë të drejtët, zhgënjejnë
entuziastët dhe dëshpërojnë të pa mbrojturit”, tha ipeshkvi i Kosovës duke shtuar
se “këtë gjendje e rëndon edhe më shumë, strukja e të drejtëve, heshtja e të mirëve,
lakmia e të diturve dhe korruptimi i të aftëve. E gjithë kjo vjen si pasojë e mohimit
të së vërtetës, përbuzjes së vlerave, mungesës së moralit shoqëror, keqmenaxhimit
të paqes, paaftësisë kolektive për të respektuar liritë dhe mungesa e përgjegjësisë
individuale, grupore dhe bartësve të detyrave shoqërore. Kush do të na ngushëlloj
në këtë gjendje, përveçse Krishti Zot me dashurinë e tij hyjnore, që na jep më shumë
shpresë në jetë”, tha mes tjerash ipeshkvi, i cili në fund për të gjithë e dha bekimin
e Krishtlindjes. Po në Katedralen ‘Nënë Tereza’, Imzot Dodë Gjergji celebroi
edhe meshën e Familjes Shenjte të dielën e parë të Krishtlindjes. Si zakonisht doli
porosia që Familja Shenjte e Nazaretit duhet të jetë model, themel dhe pasqyrë për
familjet e botës tokësore, përkatësisht edhe për familjet tona shqiptare, siç tha
ipeshkvi. “Secila shtëpi e krishterë është një kishë e vogël ku thuhet urata e bëhet
lutja në familje për dashuri e bashkëjetesë të lumtur, ndërsa në kishë vijmë për t’i
bashkuar lutjet e uratat me besimtarët tjerë, drejtuar Zotit tonë, Jezu Krishtit”,
tha ipeshkvi i cili pas kremtimit të kësaj meshe, ai veçantë i bekoi fëmijët, krijesat
më pafajshme të Zotit.