“Urbi et Orbi”: у гэта Божае Нараджэнне шмат слёз спалучаецца са слязамі Дзіцятка
Езуса (поўны тэкст)
“Дарагія браты і сёстры,
добрых святаў Божага Нараджэння!”, - так распачаў 25 снежня 2014 г. сваё святочнае
пасланне папа Францішак, звяртаючыся да тысяч вернікаў, сабраных на ватыканскай плошчы,
з цэнтральнай лоджыі базылікі св. Пятра. Адным з пунктаў яго сёлетняга паслання стала
Украіна. Пантыфік пажадаў пераадолення канфлікта і перамогі над нянавісцю і насіллем
у гэтай краіне.“Езус, Сын Божы, Збаўца свету, нарадзіўся для нас. Ён нарадзіўся ў
Бэтлееме ад Дзевы, выконваючы старажытныя прароцтвы. Імя Дзевы – Марыя, а яе мужа
– Юзаф. - звярнуўся Святы Айцец - Гэта сціплыя людзі, поўныя надзеі ў дабрыню Бога,
якія прымаюць Езуса і прызнаюць Яго. Гэтак жа Святы Дух асвяціў пастухоў з Бэтлеема,
якія прыбеглі ў пячору і пакланіліся Дзіцяці. Тады Святы Дух прывёў старцаў Сімяона
і Ганну ў ерузалемскі храм, і яны прызналі Езуса як Месію. “Бо вочы мае ўбачылі збаўленне
Тваё, якое падрыхтаваў Ты перад абліччам усіх народаў” (Лк 2, 30-31), - сказаў Сімяон.
Так,
браты, Езус ёсць збаўленнем для кожнага чалавека і кожнага народу!
Яго, Збаўцу
свету, прашу ахоўваць нашых братоў і сясцёр у Іраку і Сірыі, якія даўно пакутуюць
ад наступстваў цяперашняга канфлікту, і разам з прадстаўнікамі іншых этнічных і рэлігійных
груп адчуваюць на сабе жорсткі пераслед. Няхай гэта Божае Нараджэнне дасць ім надзею,
як і многім перасяленцам, выгнаным і бежанцам, дзецям, дарослым і пажылым, у гэтым
рэгіёне і ва ўсім свеце. Няхай зменіць абыякавасць на блізкасць, а непрыманне на гасціннасць,
каб тыя, хто перажывае ў гэты час цяжкі досвед, маглі атрымаць неабходную гуманітарную
дапамогу і знесці цяжар зімы, каб вярнуцца ў сваю краіну і жыць годна. Няхай Пан адкрые
сэрца на давер і дасць свой спакой усяму Блізкаму Усходу, пачынаючы ад зямлі, благаслаўлёнай
Яго нараджэннем, падтрымліваючы намаганні тых, хто актыўна ўдзельнічае ў дыялогу паміж
ізраільцянамі і палестынцамі.
Няхай Езус, Збаўца свету, сцеражэ тых, хто пакутуе
ва Украіне і надорыць гэту любімую зямлю пераадоленнем напружанасці, перамогай над
нянавісцю і насіллем і распачаццем новага працэсу братэрства і прымірэння.
Няхай
Хрыстус Збаўца падорыць спакой Нігерыі, дзе зноў праліваецца кроў, і дзе многія людзі
несправядліва выкрадаюцца ў сваіх блізкіх, утрымліваюцца ў якасці закладнікаў або
забіваюцца. Я малюся за мір у іншых частках афрыканскага кантынента. Я думаю асабліва
пра Лівію, Паўднёвы Судан, Цэнтральнаафрыканскую Рэспубліку і розныя рэгіёны Дэмакратычнай
Рэспублікі Конга. Я прашу ўсіх палітычных лідэраў праз дыялог уключыцца ў пераадоленне
канфліктаў і пабудову трывалага братняга суіснавання.
Няхай Езус выратуе шматлікую
колькасць дзяцей, якія з’яўляюцца ахвярамі насілля, сталі аб’ектам торгу і гандлю
людзьмі або былі вымушаны стаць салдатамі, сталі ахвярамі злоўжыванняў. Няхай дасць
суцяшэнне сем’ям загінулых на мінулым тыдні ў Пакістане дзяцей. Няхай будзе блізка
да ўсіх, хто пакутуе ад хвароб, у прыватнасці, да ахвяр эпідэмій ліхаманкі Эбола,
асабліва ў Ліберыі, Сьера-Леонэ і Гвінеі. Сардэчна дзякуючы тым, хто імкнецца дапамагчы
хворым і іх сем’ям, я зноў тэрмінова заахвочваю даць ім неабходны догляд і лячэнне.
Езус
Дзіцятка! Мае думкі кірую да ўсіх дзяцей, якіх сёння забіваюць і з якімі абыходзяцца
жорстка; тых, каго ўжо перад тым, як убачыць свет, пазбавілі высакароднай любові сваіх
бацькоў і пахавалі ў эгаізме культуры, якая ненавідзіць жыццё; дзяцей, вымушаных перасяляцца
па прычыне войнаў і пераследу, насілля і эксплуатацыі на нашых вачах і пры нашым маўклівым
саўдзеле; дзяцей, забітых у выніку бамбардаванняў, таксама і там, дзе нарадзіўся Сын
Божы. Нават сёння іх бездапаможнае маўчанне крычыць пад мечам шматлікіх Ірадаў. Над
іх крывёй сёння стаіць цень сучасных Ірадаў.
Сапраўды, у гэта Божае Нараджэнне
так шмат слёз спалучаецца са слязамі Дзіцятка Езуса.
Дарагія браты і сёстры!
Няхай Святы Дух асвеціць сёння нашы сэрцы, каб мы маглі заўважыць у Дзіцятку Езусе,
народжаным у Бэтлееме ад Дзевы Марыі, збаўленне, дадзенае Богам для кожнага з нас,
кожнага чалавека і ўсіх народаў зямлі. Няхай сіла Хрыста, якая з’яўляецца вызваленнем
і служэннем, адчуецца ў многіх сэрцах, якія церпяць пераслед, войны, абмежаванні.
Няхай праз сваю лагоднасць гэта Божая сіла выдаліць цвёрдасць з сэрц многіх мужчын
і жанчын, пагружаных у марнасць і абыякавасць, у глабалізацыю абыякавасці. Няхай Яго
адкупленчая моц перакуе зброю на аралы, разбурэнне ў творчасць, нянавісць у любоў
і пяшчоту. Тады мы зможам сказаць з радасцю: “Нашы вочы ўбачылі Тваё збаўленне”, -
завяршыў святочнае пасланне Пантыфік.
Пасля яго Францішак удзяліў вернікам
сваё благаслаўленне “Urbi et Orbi” (Гораду і Свету).