Papa të krishterëve të Lindjes së Mesme: vuaj me ju, mjaft më luftëra e dhunë!
Nuk mund të dorëzohemi përballë konflikteve në Lindjen e Mesme! Është një nga fragmentet
e letrës së gjatë, që i drejtoi Françesku të krishterëve të rajonit. Papa nënvizon
se shumë njerëz, posaçërisht në Irak, vuajnë nga sulmet e një organizate terroriste
me përmasa, të cilat pak më përpara as që mund të përfytyroheshin. Papa thekson se
duhet vijuar udha e dialogut me fetë e tjera, për të siguruar paqen, aq të dëshiruar.
Deri kur duhet
të vuajë Lindja e Mesme për shkak të mungesës së paqes? Është pyetja plot ankth e
dhimbje, që Françesku ia drejton vetes e mbarë botës. Pyetje, e cila bëhet edhe më
dramatike në çastin aktual kur, kujton Papa, popullsitë e rajonit tronditen thellë
nga sulmet e një organizate terroriste shqetësuese, që u duk në këtë skenë kohët
e fundit, me përmasa të papërfytyrueshme, gati për të kryer çdo lloj shpërdorimi e
praktike të padenjë për njeriun. Terrorizëm çnjerëzor Këta terroristë,
nënvizon Papa, sulmojnë të krishterët, të cilët i dëbojnë brutalisht nga tokat e tyre.
E kështu, vëren me dhimbje të thellë, për shumë nga ju edhe notat e këngëve të Krishtlindjes
përzjehen me lot e psherëtima. Papa nuk i harron as grupet e tjera fetare dhe etnike,
që pësojnë persekutime e vuajnë pasojat e këtyre konflikteve. I siguron të gjithë
se i ndjek ditë për ditë lajmet, që flasin për një vuajtje të parrëfyeshme, me përmasa
tronditëse, të njerëzve të Lindjes së Mesme. E mendimi i Atit të Shenjë shkon posaçërisht
tek fëmijët, nënat, pleqtë, të shpërngulurit e refugjatët, tek ata, që vuajnë nga
uria, që u duhet të përballojnë ashpërsinë e dimrit, pa strehë mbi kokë. Do
të dëshiroja të isha me ju! Me fjalë ngushëllimi e shprese, Françesku i shpreh
afërsinë e tij e të Kishës, grigjës së vogël të Lindjes së Mesme e barinjve, që e
shoqërojnë “me kujdes e dashuri”. Shpresoj shumë, shkruan, se do të kem hirin të
vij vetë t’ju vizitoj e t’ju ngushëlloj. E në vijim e nxit bashkësinë ndërkombëtare
t’i ndihmojë të krishterët dhe pakicat e tjera, duke promovuar paqen në Lindjen e
Mesme përmes bisedimeve dhe veprimtarisë diplomatike, duke u përpjekur t’i vërë pritë
e ta ndalojë sa më parë dhunën, që ka shkaktuar edhe tepër dëme. Prej këndej, thekson
se duhet t’i jepet fund menjëherë trafikut të armëve. Kemi nevojë për projekte paqeje,
nënvizon, për një zgjidhje globale të problemeve të rajonit, pa u dorëzuar kurrë përballë
konflikteve, sikur ndryshimi i situatës të ishte i pamundur. Kurrë dhunë në
emër të fesë!Gjithçka mund të ndryshojë, siguron Papa, e ndryshimi mund të mbështetet
nga dialogu ndërfetar që, sa më e vështirë të jetë situata, aq më i nevojshëm është.
Nuk ka rrugë tjetër! Dialogu është edhe ilaçi më i mirë kundër tundimit të fundamentalizmit
fetar, kërcënim i përhershëm për besimtarët e të gjitha feve. Njëkohësisht Françesku
shkruan se të krishterët e Lindjes së Mesme mund t’i ndihmojnë bashkëqytetarët myslimanë
të paraqesin një figurë më të vërtetë të Islamit, ashtu si dëshirojnë shumë prej atyre,
që vijojnë të pohojnë se Islami është fe e paqes. Gjithsesi, thekson Ati i Shenjtë,
gjendja dramatike, në të cilën jetojnë të krishterët, yazidët dhe pakicat e tjera
në Irak, kërkon të mbahet qëndrim i qartë e guximtar nga ana e të gjithë krerëve fetarë,
që duhet t’i dënojnë njëzëri e pa asnjë mëdyshje këto krime, duke denocuar edhe praktikën
e përdorimit të fesë për t’i përligjur.