18 снежня 2014 г.
папа Францішак прыняў даверчыя граматы трынаццаці новых паслоў пры Апостальскай Сталіцы.
Сярод іх, акрамя дыпламатаў з краін з хрысціянскай большасцю: Танзаніі, Руанды, Багамаў,
Дамінікі, Фінляндыі, Даніі, Новай Зеландыі, былі таксама паслы з мусульманскіх: Малайзіі,
Бангладэша, Катара, Малі, будысцкай Манголіі, а таксама з афрыканскага Тога, дзе большасць
насельніцтва практыкуе традыцыйныя анімістычныя вераванні. Звяртаючыся да дыпламатаў
сабраных у Апостальскім палацы Ватыкана, Пантыфік пажадаў, каб тут яны заўсёды “адчувалі
сябе як дома”. “Вітаю ўсіх і жадаю вам плённай працы”, - сказаў ён. Папа падкрэсліў,
што праца паслоў здзяйсняецца маленькімі крокамі, праз маленькія справы, але прыводзіць
да міру, збліжэння сэрцаў, братэрства паміж народамі.
У сувязі з гэтым, Святы
Айцец падкрэсліў прыклад аднаўлення адносін паміж ЗША і Кубай – “двух народаў, якія
на працягу доўгіх гадоў былі аддалены адзін ад аднаго, а ўчора зрабілі крок да збліжэння”.
Францішак адзначыў, што гэта стала магчыма менавіта дзякуючы дыпламатыі і працы паслоў.