Каталіцкія скаўты ў Беларусі на службе грамадству і Касцёлу
На мінулых выходных
у Гомелі адбылося педагагічнае спатканне для ўсіх звязовых каталіцкіх скаўтаў Беларусі,
што працуюць па педагогіцы Федэрацыі скаўтаў Еўропы (FSE). Звязовыя – тыя, хто займаецца
дзецьмі-скаўтамі ўзростам 12-17 гадоў. Мэта такіх сустрэч – падзяліцца досведам, даведацца
аб нечым новым у педагогіцы скаўтынгу. Прычым, адначасова на асобных спатканнях сустрэліся
як хлопцы-скаўты, так і дзяўчаты-скаўткі з усёй Беларусі на чале з Генеральным камісарам
каталіцкіх скаўтаў у Беларусі Паўлам Граковічам і Генеральным камісарам каталіцкіх
скаўтак у Беларусі Вольгай Гарашэвіч. Беларуская рэдакцыя Ватыканскага радыё мела
магчымасць даведацца ў лідэраў беларускіх скаўтаў аб сучасным становішчы гэтага руху
ў беларускіх парафіях і перспектывах развіцця.
Па апошніх дадзеных у Беларусі
зараз 90 дзяўчат-скаўтак, 34 “Божыя кароўкі” (дзяўчынкі ўзростам да 12 гадоў, якія
рыхтуюцца стаць скаўткамі) і 33 шэфы (дарослыя скаўткі, што працуюць з дзецьмі), падзялілася
Вольга Гарашэвіч. “Развіваемся, ідзём далей, вопытныя дзяўчаты дзеляцца досведам з
новымі звязовымі. У гэтым годзе мы ўдзельнічалі ў спатканні ўсіх скаўтаў Еўропы –
“Еўраджэме”, і сёння вырашылі, што трэба зноў сустрэцца, каб падзяліцца радасцю ад
гэтай падзеі: 22 лютага на Дзень братэрскай думкі ў нас будзе спатканне ўсіх звязаў
і КВН на тэму, што чакалі ад “Еўраджэму”, і што атрымалі”, - падзялілася Генеральны
камісар скаўтак у Беларусі.
Хлопцаў-скаўтаў у краіне налічваецца каля 160.
Калі глядзець агулам на скаўтынг у Беларусі, зараз лідэры працуюць больш над якасцю
педагогікі ў дзеючых адзінках, а таксама робіцца вялікі акцэнт на развіцці скаўтынгу
ў Мінску, адзначыў Павел Граковіч.
“У Мінску зараз дзейнічае больш за дзесяць
парафій, а рэальная скаўцкая адзінка толькі адна і яна не поўная – не завершаная дружына.
Таму шмат працы, інвестыцый у тое, каб у Мінску таксама з’явіліся адзінкі. На сённяшні
момант у парафіі св. Роха ў Мінску ўжо дзейнічаюць скаўцкія адзінкі, ёсць зграя “ваўчанят”
(хлопцы ад 8 да 11 гадоў), таксама ствараецца адзінка дзяўчат-скаўтак ад 12 да 17
год і таксама, калі знойдзем адпаведную колькасць дзяцей, будуць “Божыя кароўкі” і
скаўты ад 12 да 17 гадоў”, - падзяліўся скаўцкі лідэр.
На сустрэчы ў Гомелі
звязовыя запланавалі тэхнічны курс для скаўтаў, які адбудзецца ў красавіку. Мэта курсу
– каб дзеючыя скаўты даведаліся больш глыбока пра вядомыя скаўцкія тэхнікі і вывучылі
новыя. Таксама на пачатку мая плануецца нацыянальная вандроўка ў Гудагай, а ўлетку
кожная скаўцкая адзінка будзе ладзіць свае “летнікі”.
Увогуле, скаўцкі рух
у каталіцкіх парафіях Беларусі аб’ядноўвае разам розныя пакаленні: ад 8-гадовых дзяцей
да сталых мужчын і жанчын неабмежаванага ўзросту. У скаўтынгу праходзіць як духоўная,
так і маральная, фізічная фармацыя чалавека. Скаўты служаць у парафіях, прымаючы на
сябе разнастайныя абавязкі, выконваюць сацыяльнае служэнне, вучацца жыць на прыродзе
і любіць яе, бачыць у прыродзе Бога. У адрозненні ад іншых скаўтаў каталіцкія маюць
сваю спецыфіку: гэта прыналежнасць да парафіі, удзел у св. Імшы, адмысловыя абавязкі
і адпаведная педагогіка.
А на днях хлопцаў і дзяўчат чакае вельмі пачэсная
справа: развезці па парафіях агонь з Бэтлеему, які прыбудзе ў Беларусь 19 снежня 2014
г. У гэты дзень, пасля перадачы на польска-беларускай мяжы, яго ўрачыста прымуць на
св. Імшы ў катэдральным касцёле Гродна, дзе збяруцца каталіцкія скаўты, каб запаліць
свае лампады і развезці агонь па Беларусі. Па шляху да Мінска Бэтлеемскі агонь плануюць
даставіць у Іўе, Ліду і Івянец, а ўрачысты ўнос сімвала Божага Нараджэння ў мінскі
архікатэдральны касцёл адбудзецца 21 снежня ў 13.00. Плануецца, што агонь з рук каталіцкіх
скаўтаў прыме Мітрапаліт Мінска-Магілёўскі, арцыбіскуп Тадувуш Кандрусевіч. З Мінска
Бэтлеемскі агонь каталіцкія скаўты развязуць у напрамках Гомеля, Барысава і Віцебска,
па шляху перадаючы яго ў каталіцкія парафіі іншых гарадоў. У сталіцы і іншых гарадах
ўсе жадаючыя змогуць запаліць свае лампады, каб занесці агонь з Бэтлеему ва ўласныя
дамы ці перадаць родным.