(Ռ.Վ.15 դեկտեմբեր 2014) ''Աւետարանի ուրախութիւնը ապրիլ կը նշանակէ Աստուածային
կոչումը ազատութեամբ ապրիլ եւ լաւապէս ըմբռնել կրօնական միաբանութեան խարիսմը'', կը
կարդանք Խրուաթ եպիսկոպոսներու պատգամին մէջ, ուղղուած կրօնաւոր-կրօնաւորուհիներուն,
նուիրեալ անձերու տարւոյն առթիւ։ Նշենք որ ‘’Անձինք Նուիրեալք’’ տարին սկիզբ առաւ
անցեալ 30 Նոյեմբերին եւ պիտի եզրափակուի 2 Փետրուար 2016-ին, Տեառնընդառաջի տօնին օրը։
Պատգամին մէջ եպիսկոպոսները կը յորդորեն նուիրեալ անձերը բացուելու Ս. Հոգւոյն ներգործութեան։
Աստուծոյ հաւատալը հիմնական է։ Կրօնաւորին գործն ու առաքելութիւնը պէտք է պտուղը ըլլայ
անոր ապրուած հաւատքին։ Կրօնաւորը կանչուած է ըլլալու տեսանելի նշանը Աստուծոյ ներկայութեան
ընկերութեան մէջ։ Խրուաթիայի եկեղեցին կրօնաւորական տարին պէտք է նկատէ բարեբեր երկրի
հաւատքի յառաջդիմութեան ու ամրապնդման ու առիթ` աւելի արժէքաւորելու կրօնաւորական կոչումը։ Պատգամին
աւարտին եպիսկոպոսները կը յայտնեն որ յառաջիկայ 14 Մարտ 2015-ին ազգային ուխտագնացութիւն
մը պիտի կազմակերպուի ''Marija Bistrica'' սրբավայրին մէջ, ուր առիթ պիտի ըլլայ շփում
հաստատել կրօնաւոր-կրօնաւորուհիներուն հետ։