Lindja e Mesme dhe Guantanamo, në bisedën Kerry-Parolin
Sot paradite, në Vatikan, u takuan Sekretari i Shtetit Papnor, kardinali Pietro
Parolin me sekretarin e Shtetit amerikan, John Kerry. Nga pala amerikane morën
pjesë edhe ambasadori pranë Selisë së Shenjtë si dhe dy anëtarë të stafit të sekretarit
të Shtetit; për palën vatikanase, zyrtarë të Kuries, kompetentë për argumentet e trajtuara. “Temat
kryesore, njofton drejtori i Sallës vatikanase të Shtypit, atë Federiko Lombardi,
ishin situata në Lindjen e Mesme dhe angazhimi i SHBA-ve për të shmangur rrezikun
e rëndimit të tensioneve si dhe të shpërthimit të dhunës; veç kësaj, edhe angazhimi
për të favorizuar rifillimin e bisedimeve ndërmjet Izraelit e Palestinës. U fol edhe
për angazhimin e SHBA-ve për mbylljen e burgut të Guantanamos si dhe për dëshirën
lidhur me vëmendjen e favorshme të Selisë së Shenjtë në kërkimin e rrugëzgjidhjeve
të përshtatshme humanitare për të burgosurit aktualë”. “Koha e shkurtër në dispozicion,
përfundon atë Lombardi, i pengoi biseduesit të trajtonin tema të tjera, që vetëm sa
u cekën, posaçërisht situata në Ukrainë dhe perspektivat e emergjencës për epideminë
e Ebolës”.