Կուատալուփի Տիրամօր տօնին առթիւ Ս. Պետրոսի մէջ Սուրբ պատարագ։
(Ռ.Վ.12 դեկտեմբեր 2014) Ուրբաթ` 12 դեկտեմբեր 2014-ի յետմիջօրէի ժամը
6-ին Ֆրանչիսկոս Սրբազան Քահանայապետը Վատիկանի Սուրբ Պետրոսի մայր տաճարին մէջ, Կուատալուփի
Տիրամօր տօնին առթիւ, կը գլխաւորէ` Լատինամերիկայի պաշտպան սրբուհի` Կուատալուփի Տիրամօր
նուիրուած համապատարագի սուրբ արարողութիւնը եւ որուն իրենց մասնակցութիւնը կը բերեն
լատին ամերիկայի երկիրներու հաւատացեալները, որոնք սուրբ Պետրոս կը ժամանեն իրենց երկիրներու
դրօշակներով, սկսեալ ժամը 16.45-էն, մասնակցելու Կուատալուփի Տիրամօր սուրբ վարդարանի
ջերմեռանդական աղօթքին, սուրբ ծննդեան պատրաստութեան շրջանի ժողովրդական շարականներու
կատարողութեամբ։ Յայտնենք որ 12 դեկտեմբեր 2011-ին, Պենետիկտոս ԺԶ վաստակաւոր քահանայապետը
առաջին անգամ ըլլալով, Վատիկանեան Պազիլիքային մէջ տօնախմբեց Կուատալուփի Տիրամօր ծիսական
տօնակատարութիւնը` մատուցելով Սուրբ Պատարագի զոհը։ 2014-ի սուրբ զոհի ընթացքին պիտի
կատարուի` Արժանթինցի երաժիշտ ու հեղինակ` Արիէլ Րամիրէսի ''Միզա Քրիոլլա'' պատարագի
երգեցողութիւնը, ղեկավարութեամբ Արիէլ Րամիրէսի զաւակ` Ֆաքունտօ Րամիրէսի ու անոր նուագախումբին
եւ մասնակցութեամբ Հռոմի ''Մուզիքա Նուովա'' երգչախումբին ։ Նշենք նաեւ թէ 50 տարիներ
առաջ, Արիէլ Րամիրէսը, այդ շրջանին յօրինած ''Միզա Քրիոլլա'' պատարագի երաժշտական այս
ստեղծագործութիւնը ներկայացուցած էր երանելի Պօղոս Զ երջնակայիշատակ Քահանայապետին ։