Францішак: час пошуку рашэнняў праблемы клімата набліжаецца да канца
У першыя снежаньскія
дні ў сталіцы Перу Ліме праходзіць 20-я Канферэнцыя дзяржаў-удзельніц Рамачнай канвенцыі
ААН па змяненню клімата. Папа Францішак скіраваў пасланне да ўдзельнікаў форума, у
якім адзначыў, што пытанні, якія на ім абмяркоўваюцца адаб’юцца на лёсе ўсяго чалавецтва,
асабліва на жыцці найбяднейшага насельніцтва і будучых пакаленняў. Пантыфік падкрэсліў,
што гэта велізарная этычная і маральная адказнасць. На думку Святога Айца, сімвалічна,
што канферэнцыя праходзіць на ўзбярэжжы, якое абмываецца марскім цячэннем Гумбальта.
Плыні гэтага цячэння яднаюць народы Амерыкі, Акіяніі і Азіі і граюць вырашальную ролю
ў фарміраванні клімату ўсёй планеты. Змены ў навакольным асяроддзі многіх краін, перш
за ўсё выспавых дзяржаў Ціхага акіяна, служаць напамінам пра сур’ёзныя наступствы
нядбайнасці і абыякавасці, піша папа Францішак. Змаганне з глабальным пацяпленнем
будзе эфектыўным толькі пры ўмове пераадолення прыватных інтарэсаў і вызвалення ад
палітычнага і эканамічнага ціску. Час пошуку глабальных рашэнняў набліжаецца да канца,
неабходна дзейнічаць узгоднена і супольна, даць калектыўны адказ, заснаваны на салідарнасці,
дыялогу і адказнасці па захаванні планеты і чалавечай сям’і, гаворыцца ў пасланні.