Ndryshimet klimaterike. Papa: mbetet pak kohë për rrugëzgjidhje të përshtatshme
Koha për të gjetur rrugëzgjidhje globale lidhur me pasojat e ndryshimeve ambientale,
po merr fund. Kështu shkruan Papa Françesku në mesazhin drejtuar Ministrit të Ambientit
të Perusë, Manuel Pulga Vidal, kryetar i Konferencës së OKB-së mbi klimën, që do të
përfundojë nesër, në Limë. Vetëm duke vepruar së bashku e në harmoni, nënvizon
Papa, mund të gjinden rrugëzgjidhjet e duhura për t’u bërë ballë ndryshimeve ambientale,
që po ndjehen që tani e në mënyrë dramatike, në shumë shtete, posaçërisht në viset
ishullore të Paqësorit. Pasojat, shpjegon Ati i Shenjtë, na kujtojnë sa rëndë peshojnë
moskokëçarja e plogështia. Temat, në qendër të vëmendjes në Konferencë kanë të
bëjnë me fatet e gjithë njerëzimit, e posaçërisht të të varfërve e të breznive të
ardhshme. Është përgjegjësi e rëndë etike e morale. E fakti, shkruan Papa, që Konferenca
mbahet në brigjet pranë rrymës detare Humboldt, që lidh simbolikisht popujt e Amerikës,
Oqeanisë e Azisë, është shumë domethënës. Duke kujtuar qartë detyrën etike për të
vepruar, Papa Françesku nënvizon se lufta kundër ngrohjes globale do të jetë e mundur
vetëm përmes përgjigjes kolektive plot përgjegjësi, të lirë nga presionet politike
dhe ekonomike.