Святы Айцец напісаў ліст з нагоды правядзення Сусветнай сустрэчы сем’яў
Францішак пацвердзіў
свой удзел у Сусветнай сустрэчы сем’яў, якая пройдзе ў Філадэльфіі, у Злучаных Штатах
Амерыкі, 22-27 верасня 2015 г. У сваім спецыяльным лісце да арцыбіскупа Вінчэнца Паліі,
старшыні Папскай рады па справах сям’і, Пантыфік нагадаў, што місіяй хрысціянскай
сям’і сёння з’яўляецца абвяшчэнне свету Божай любові. Касцёл не можа характарызаваць
сям’ю з пункту гледжання ідэалагічных канцэпцый: казаць пра кансерватыўную або прагрэсіўную
сям’ю, заўважыў Папа. Каштоўнасць і годнасць сям’і, яе сутнасная ісціна, падкрэсліў
ён, не могуць быць аспрэчаны. Сужонкам сёння важна не “заразіцца” мірскім менталітэтам
– індывідуалістычным, спажывецкім, геданічным – і верна ісці шляхам прыгажосці і радасці
быцця сям’ёй.
Пантыфік спаслаўся на Сінод Біскупаў на тэму сям’і і нагадаў,
што мэтай яго наступнай сесіі будзе спроба выпрацоўкі душпастырскіх прапаноў адносна
сям’і ў тым сацыяльным і культурным кантэкстах, у якім яна сёння знаходзіцца. Ён заклікаў
сужонкаў, святароў, парафіяльныя супольнасці, касцёльныя рухі і аб’яднанні кіравацца
Божым словам у разважанні аб будучыні гэтага найважнейшага сацыяльнага інстытуту.
Францішак
выказаў удзячнасць Філадэльфійскай архідыяцэзіі за жаданне прыняць форум, а яго арганізатарам
удзяліў сваё апостальскае благаслаўленне.