«Կու գայ այն Օրը, երբ Թուրքիան կը ճանչնայ Հայոց Ցեղասպանութիւնը» կ՛ըսէ Հրանուշ Յակոբեան։
Հայաստանի Ազգային ժողովի արտաքին յարաբերութիւններու մնայուն յանձնախումբին կողմէ հրաւիրուած
«Աշխարհը առանց ցեղասպանութիւններու» նիւթով լսումներուն ընթացքին, երկուշաբթի 8 դեկտեմբերին,
Հայաստանի Հանրապետութեան սփիւռքի նախարար Հրանուշ Յակոբեան յայտարարեց, որ կու գայ օր
մը, երբ Թուրքիան կը ճանչնայ Հայոց ցեղասպանութիւնը: «Պիտի գայ օր մը, երբ Թուրքիան
պատասխան պիտի տայ սահմաններու փակ ըլլալուն, Հայաստանը տնտեսապէս ճնշելու համար: Պէտք
է Ցեղասպանութեան հետեւանք նկատել այն, որ ամբողջ ազգ մը տառապանքի, մտորումներու մէջ
է, որ 100 տարուան ընթացքին միլիոնաւոր զաւակներ չծնան: Մենք կորսնցուցած ենք ամէն ինչ:
Մնացած են պատմական յիշողութիւնները», ըսաւ ան: Հայաստանի Հանրապետութեան սփիւռքի
նախարարը աւելցուց, որ Թուրքիոյ մէջ այսօր ինքնութեան ճգնաժամ է, որովհետեւ բոլոր ազգային
փոքրամասնութիւնները այսօր կը յայտարարեն իրենց ազգութեան մասին ու կը պահանջեն ճանչնալ
զայն: Հրանուշ Յակոբեան նշեց, որ պէտք է շարունակել պայքարը, որքան ալ դժուար ըլլայ
եւ նկատեց, որ արդէն բանը հասած է այնտեղ, որ փաստաթուղթ ներկայացուած է Թուրքիոյ խորհրդարանին`
ճանչնալու Հայոց ցեղասպանութիւնը, իսկ Կանաչներու կուսակցութիւնը արդէն իսկ ճանչցած է
զայն: «Մենք կը հաւատանք, որ յառաջադէմ մարդիկ պիտի միանան մեր պայքարին», նշած է ան: Ելոյթի
վերջաւորութեան սփիւռքի նախարարը մէջբերեց Պարոյր Սեւակի «Անլռելի Զանգակատուն» ստեղծագործութենէն
հատուած մը. «Ա՛խ, ինչպէ՞ս, ո՞նց մոռանալ, արհաւիրքն այն օրերի. աշխարհում ով մոռանայ,
ջուխտ աչքով թող քոռանայ…»: