«Սերովբէ հողեղէն և մարմնաւոր Քերովբէ» Բիւզանդական եկեղեցւոյ մէջ, 6-րդ դարէն սկսեալ,
կը յայտնուին Մարեմեան տօները. Աւետման տօնը՝ 25 մարտին, Մարիամի Ծննդեան տօնը՝ 8 Սեպտեմբերին
և Ննջումն Աստուածամօր կամ Վերափոխումը՝ 15 Օգոստոսին: 8-րդ դարուն՝ կը սկսի յիշատակուիլ
նաեւ Մարիամ Կոյսին Անարատ Յղութեան Տօնը՝ 9 Դեկտեմբերին: Հայ Եկեղեցւոյ աւանդութեան
մէջ, հնագոյն տօնն որ կը յիշուի՝ Աստուածամօր Ննջումը կամ Վերափոխումն է՝ 15 Օգոստոսին
կամ այդ թուականին մօտիկ կիրակին: Կոյսին Ծննդեան տօնը՝ 8 Սեպտեմբերին, կը սկսի յիշուիլ
11-րդ դարուն, իսկ ասոր մասին շարականները կը յօրինեն Մեծն Վարդան Վարդապետը և Յակոբ
Կլայեցի Կաթողիկոսը: Անարատ Յղութեան տօնը կը սկսի յիշուիլ 13-րդ դարուն և տօնին օրը՝
9 Դեկտեմբերը, ինչպէս Յոյներուն մօտ:
Այս տօնին շարականը յօրինած է Գրիգոր Անավարզեցի
Կաթողիկոսը (1293-1307) հետեւեալ տիտղոսով. «Կանոն յղութեան Սրբուհւոյ Աստուածածնին ի
Յովակիմայ և յԱննայէ որ է Դեկտեմբեր ամսոյ յինն»: Կաթողիկոսը շարականը յօրինած է խնդրանքով
Կոստանդին Ա. Թագաւորին, ինչպէս շարականին տուներուն սկզբնատառերը զայն ցոյց կու տայ:
Շարականին հնագոյն օրինակը կը գտնուի Օշինի ժամագիրքին մէջ, զոր հրատարակեց 1933-ին,
Արտավազդ Արք. Սիւրմելեան: Անոր երկրորդ հրատարակութիւնը կատարեց Մխիթարեան Հ. Եփրեմ
Պօղոսեան 1969-ին, իր «Անարատ Յղութիւնը և Հայ Եկեղեցին» մատեանին մէջ: