Папа прыняў дэлегацыю Міжнароднай тэалагічнай камісіі
5 снежня 2014 г. папа
Францішак сустрэўся з членамі Міжнароднай тэалагічнай камісіі, якая была створана
па прапанове Сінода Біскупаў неўзабаве пасля II Ватыканскага Сабора. Яе місія – “вывучаць
найважнейшыя праблемы дактрыны Касцёла, асабліва яе новыя аспекты”, нагадаў Пантыфік
і дадаў, што, 26 апублікаваных камісіяй дакументаў служаць пацвярджэннем гэтага і
арыенцірам для тэалагічных дэбатаў. Святы Айцец падкрэсліў, што служэнне Касцёлу патрабуе
ад тэолагаў не толькі інтэлектуальнай кампетэнтнасці, але і духоўных рысаў. Да апошніх
ён аднёс здольнасць слухаць. На думку Францішка, тэолаг – гэта, у першую чаргу, вернік,
які слухае Боскае слова і прымае яго сэрцам і розумам. Але тэолаг павінен таксама
быць уважлівым да розных праяўленняў веры Божага народа, трымаць вочы і вушы адкрытымі
да “знакаў часу”. У гэтай сувязі Папа адзначыў больш значную прысутнасць жанчын у
складзе камісіі. Па яго словах, гэта прысутнасць прапануе задумацца аб тым, якую ролю
адыгрываюць жанчыны ў галіне тэалогіі.
Пантыфік падкрэсліў таксама такую характэрную
рысу камісіі, як яе міжнародны аспект, уласцівы і ўсяму Каталіцкаму Касцёлу. Ён адзначыў,
што разнастайнасць пунктаў гледжання павінна ўзбагачаць каталіцтва, не наносячы шкоды
яго адзінству. Адзінства каталіцкіх тэолагаў засноўваецца на адзінай веры ў Хрыста
і падтрымліваецца разнастайнасцю дароў Святога Духа, нагадаў Пантыфік. У канцы сустрэчы
ён удзяліў тэолагам сваё благаслаўленне і папрасіў іх маліцца за яго.