Papa Françesku: kurrë të mos harrohet vuajtja e skllevërve modernë
Papa Françesku i dërgon sot një mesazh të shkurtër Konferencës Ndërkombëtare të Grupit
të Shën Martës për luftën kundër trafikut të njerëzve, që po mbahet në Londër sot
e nesër. Ati i Shenjtë shpreh mirënjohjen për vendosmërinë në çrrënjosjen e kësaj
së keqeje dhe për angazhimin e pjesëmarrësve në punën e nisur në konferencën e Vatikanit,
në prill të këtij viti. “Përpjekjet tuaja për të promovuar dialogun mbi mjetet
juridike kundër trafikut të njerëzve, në favor të ndihmës thelbësore për ata, që pësojnë
këtë lloj skllavërie – shkruan Papa – janë veçanërisht të rëndësishme për të nxjerrë
në pah natyrën e fshehtë të këtij krimi. Nuk duhet ta harrojmë kurrë e as ta injorojmë
vuajtjen e shumë burrave, grave e fëmijëve, dinjiteti njerëzor i të cilëve dhunohet
përmes këtij shfrytëzimi”. Ati i Shenjtë falenderon ministrin e brendshëm britanik,
komisarin e policisë dhe Konferencën Ipeshkvnore vendase për organizimin e takimit,
duke ripohuar angazhimin e Kishës Katolike në luftën kundër trafikut të njerëzve dhe
në mbështetjen e viktimave.