Papa: shenjtorët e panjohur, të përditshëm, na japin shpresë
Ka shumë shenjtorë të panjohur, burra e gra, etër e nëna familjesh, të sëmurë, meshtarë,
që zbatojnë në praktikë, çdo ditë, dashurinë e Jezusit e kjo na jep shpresë: kështu
tha Papa Françesku në meshën e mëngjesit në Shtëpinë e Shën Martës. Është vërtet
i krishterë ai, që e zbaton në praktikë Fjalën e Zotit, nuk mjafton të thuash se beson.
Duke komentuar Ungjillin, që flet për shtëpinë e ndërtuar mbi shkëmb, ose mbi rërë,
Ati i Shenjtë i ftoi besimtarët të mos jenë të krishterë sa për sy e faqe, të krishterë
në dukje, sepse sapo fillon të bjerë pak shi, grimi mbi fytyrë zhduket. Nuk mjafton
të jesh anëtar i një familjeje shumë katolike, ose i ndonjë shoqate bamirëse, nëse
nuk ndiqet vullneti i Hyjit. Të krishterët në dukje ulin armët që në tundimet e para,
sepse e kanë ndërtuar shtëpinë mbi rërë. Ata që e ndërtojnë shtëpinë mbi shkëmb, mbi
Krishtin, nënvizoi Papa, janë shenjtorët e përditshëm, që nuk njihen zyrtarisht nga
Kisha, por ashtu si të kanonizuarit, vënë në jetë mësimet e Jezusit, duke dëshmuar
dashurinë e Zotit: “Të mendojmë për më të vegjlit, eh? Për të sëmurët, që i
ofrojnë vuajtjet për Kishën, për të tjerët. Të mendojmë për sa e sa të moshuar të
vetëm, që luten e ofrojnë. Të mendojmë për sa e sa nëna e baballarë familjesh, që
ecin përpara me shumë mund, që edukojnë fëmijët, angazhohen me punën e përditshme,
me problemet, por gjithnjë me shpresë në Jezusin, pa u mburrur, duke bërë ç’munden”. Janë
shenjtorët e jetës së përditshme, theksoi Papa: “Të mendojmë për sa e sa meshtarë,
që nuk duken, por punojnë në famullitë e tyre me shumë dashuri: katekizmi për fëmijët,
kujdesi për të moshuarit, për të sëmurët, përgatitja për çiftet e reja… E çdo ditë
e njëjta gjë, e njëjta gjë, gjithmonë. Nuk mërziten, sepse në themelet e shtëpisë
së tyre është shkëmbi. Është Jezusi, kjo i jep shenjtëri Kishës, kjo i jep shpresë!” Të
gjithë jemi mëkatarë, vazhdoi Papa Françesku. Edhe këta të krishterë, madje bëjnë
edhe mëkate të rënda, por pendohen e ndërrojnë rrugë. Nuk e ngatërrojnë mëkatin me
virtytin, prandaj e kanë ndërtuar shtëpinë mbi shkëmb. Sot jemi, nesër s’jemi, citoi
Papa shën Bernardin. “Mendo o njeri, ç’do të bëhesh: ushqim për krimbat”, tha Ati
i Shenjtë, duke iu drejtuar atyre, që nuk përpiqen për të fituar jetën e amshuar: “Në
këtë kohë përgatitjeje për Krishtlindjen, t’i lutemi Zotit që t’i kemi themelet e
forta në shkëmbin, që është Krishti; shpresa jonë është në Të. Ne jemi të gjithë mëkatarë,
jemi të dobët, por nëse shpresojmë në Të, mund të ecim përpara. Ky është gëzimi i
të krishterit: ta dijë se në Krishtin ka shpresë, ka falje, ka paqe, ka gëzim. E të
mos shpresojmë në gjëra që, sot janë, nesër s’janë”.