Si në mbarë botën edhe Kisha Katolike në Kosovë, ka kremtuar të dielën e parë të Kohës
së Ardhjes, duke filluar kështu me sa më shumë shpresë edhe një vit tjetër liturgjik.
Për katër javë rresht nga kisha e gjallë dhe besimtarët kërkohet impenjim dhe përgatitje
sa më të mëdha, e sidomos shpirtërore, në mënyrë që, në mendjet e në zemrat tona t’i
lëmë vend lindjes se Krishtit fëmijë, Shëlbuesit të mbarë njerëzimit. Kështu tha Ipeshkvi
i Kosovës, Shkëlqesia e tij Imzot Dodë Gjergji në Katedralen ‘Nënë Tereza’ në Prishtinë
në meshën e kësaj të diele, të cilën e kremtoi në bashkëmeshim me don Rrok Gjonlleshajn
dhe don Fatmir Koliqin. Në lutje e uratë morën pjesë një numër i madh besimtarësh
vendorë e ndërkombëtarë, të cilët punojnë e veprojnë në Kosovë. ‘Katër javët e ardhshme
janë Kohë pendimi e kthimi, lutjeje në heshtje, e para së gjithash përgatitje shpirtërore
për ta pritur ardhjen e Shëlbuesit tonë Jezu Krishtit. Ai vjen e ne duhet ta ndjejmë
në mendje e në zemër praninë e tij. Kërkohet që të rrimë zgjuar, të gatshëm e të kujdesshëm,
sepse dëshirat e përditshme e të pakontrolluara mund të na pengojnë qëllimin tonë
në takim me Zotin, i cili na mëson se duhet të jemi gjithmonë kripa e tokës e drita
e botës, sepse jemi të krishterë, që nënkupton të jesh njeri i shpresës dhe i gëzimit
për vete dhe të tjerët’, tha Imzot Dodë Gjergji, duke shtuar se kjo kohë - katër javët
e Ardhjes - është kohë kur secili duhet t’i kthehet vetvetes dhe të analizojë jetën
e tij të përditshme. Të mos harrojmë se te të krishteret nuk duhet të ketë vend trishtimi,
dëshpërimi apo zhgënjimi, sepse të besosh në Jezu Krishtin, do të thotë se shpresa
e drita ndriçojnë njerëzimin në mbarë rruzullin tokësor. Pas kësaj porosie, Imzot
Dodë Gjergji në fund të meshës dha bekimin e të dielës së parë të Kohës së Ardhjes.