Strasburgu është qytet i Francës lindore (140km mbi nivelin e detit), kryeqendër e
Alsasës dhe e Departamentit të Renit të poshtër, në kufi me Gjermaninë. Të 1.145.000
banorët e tij jetojnë në një qendër urbane ndërkufitare, që përfshin edhe qytetin
gjerman të Kehl. Përshkohet nga Ill, degë e lumit Ren, që rrjedh në tre drejtime në
qendrën historike të qytetit “Grande Île”, përfshirë në listën e Trashëgimisë së Njerëzimit
të UNESCO-s (1988). Territori gjatë Renit është i pasur me ishuj, të rrethuar nga
lumi i kanalizuar e nga kanalet e portit autonom. Në lindje të komunës shtrihet pylli
i zi. Kronikat më të lashta të qytetit janë ato, që i përkasin fushatave ushtarake
romake të viteve 14-16 para Krishtit. Duke nisur nga shekulli IV, Strasburgu është
seli ipeshkvnore. Qendër e madhe shkëmbimesh tregtare në Mesjetën e vonë, më 1262
u bë qytet i lirë. Pas skizmës së vitit 1520, qyteti nisi të ndjekë doktrinën e Martin
Luterit, ndjekësit e të cilit themeluan, në shekullin e mëpasëm, universitetin e tyre.
Franca e pushtoi Strasburgun në vitin 1681, nën sundimin e Luigjit XIV, pushtim që,
një vit më vonë, u ratifikua nga Traktati i Ryswick-ut. Më 1970 qyteti u pushtua nga
Gjermania, për t’u rimarrë nga Franca në përfundim të luftës botërore (1919) e, së
fundi, përsëri nga Gjermania (1940), deri më 1945, kur u rikthye nën sovranitetin
francez. Vija e kufirit ndërmjet Francës e Gjermanisë, që në shekuj përshkoi Strasburgun
e rajonin e tij, ndau edhe bashkësi e familje, shpesh në fronte kundërshtare gjatë
konflikteve. Për këtë arsye, monumenti i ngritur për kujtim të të rënëve të të
gjitha luftërave, ka pamjen e një nëne, që mban në prehër trupat e dy bijve, krejtësisht
lakuriq, pa asnjë divizë ose shenjë, që të kujton cilës palë kundërshtare i përkisnin.
Strasburgu u zgjodh si Seli e Këshillit të Evropës në vitin 1949 e seli e Parlamentit
Evropian, më 1952. Është qytet me identitet të dyfishtë kombëtar e kulturor, ku
janë të pranishme një sërë institucionesh evropiane, vendosur këtu pas Luftës II Botërore,
nën shtytjen e lëvizjes drejt integrimit evropian. Në Lagjen Evropiane të qytetit
numërohen rreth 20 institucione, ndërmjet të cilave, Këshilli i Evropës(1949), Parlamenti
Evropian(1952), sistemi i informacionit Schengen i policive të Evropës, Vëzhguesi
Evropian i Audivizionit, Eurocorps, qendra informative Europol, Farmakopeja evropiane,
kanali televiziv franko-gjerman ARTE etj etj. Për t’u kujtuar, edhe shkolla e famshme
“École Nationale d’Administration” (ENA) themeluar nga Charles De Gaulle(1945) për
të formuar klasën e re drejtuese, në përfundim të Luftës II Botërore. Ndër monumentet
më në zë, kujtojmë Katedralen e Shën Marisë dhe monumentet historike Temple Neuf,
seli e Kishës më të lashtë protestante të qytetit; kishën Seint -Pierre-le-Vieux,
me dy ndërtesa kulti, katolike e protestante, që komunikojnë; Kishën e Saint-Jean(1477),
Monumentin kombëtar francez; Palais des Rohan, rezidencë vigane baroke e princave-ipeshkvij;
Urat e mbuluara, fortifikimet mesjetare mbi malin Ill; Qytetin-Kopsht të Stockfeld
(fillimi i shek XX); Terminalin e tramit në Hoenheim(2001), vepër e arkitektit anglo-irakian,
Zaha Hadid.Qyteti bën pjesë në “Eurodistrikt Strasbourg/Ortenau”, themeluar më 2005,
sipas dëshirës së Presidentit francez, Jacques Chirac dhe të kancelarit gjerman,
Gerhard Schroeder. Është një grup bashkëpunimi territorial ndërkufitar, formuar nga
komuna e Strasburgut dhe nga pesë komuna gjermane. Kujtojmë se ka edhe disa Eurodistrikte,
që synojnë të fuqizojnë integrimin ndërmjet bashkësive franceze, gjermane e zvicerane.