Ватыкан: католікі і мусульмане шукаюць адказы на выклік пашырэння насілля ў свеце
11 лістапада 2014
г. у Рыме пачалася ІІІ сесія Каталіцка-мусульманскага форума на тэму “Працаваць разам,
каб служыць іншым”. Мерапрыемства працягнецца да 13 лістапада, а яго ўдзельнікаў прыме
на аўдыенцыі папа Францішак. У цэнтры ўвагі удзельнікаў спаткання знаходзяцца пытанні,
звязаныя з выхаваннем моладзі, супрацьстаяннем насіллю і рэалізацыяй дыялогу паміж
хрысціянаствам і ісламам. Гэтыя тэмы, асабліва важныя перад абліччам павелічэння колькасці
выпадкаў выкарыстання рэлігіі для апраўднання жудасных злачынстваў, лічыць сакратар
Папскай рады па міжрэлігійным дыялогу кс. Мігель Анхель Аюса Гішот. У інтэрв’ю французскай
“La Croix” святар распавёў, што ўдзельнікі рымскай сустрэчы спрабуюць знайсці спосабы
ўмацавання дыялогу, якія б паслужыў карысці ўсяго чалавецтва.
Мусульманскую
дэлегацыю на форуме, як і падчас папярэдніх сесій – у 2008 г. і 2011 г. – узначальвае
іарданскі прынц Газі Бін Мухамед. У яе склад уваходзяць прадстаўнікі розных краін:
ад Інданэзіі да Паўночнай Афрыкі. На чале каталіцкага прадстаўніцтва стаіць кардынал
Жан-Луі Таран, старшыня Папскай рады па міжрэлігійным дыялогу.