Пантыфік да законнікаў: быць у свеце знакам, якому супраціўляцца будуць
Манаскае жыццё, дзякуючы
сваёй прывабнасці, дапамагае Касцёлу пашырацца адзначыў папа Францішак 7 лістапада
2014 г. падчас аўдыенцыі для членаў італьянскай Канферэнцыі вышэйшых настаяцеляў манаскіх
супольнасцяў. Калі браты і сёстры даюць сапраўднае сведчанне манаскага жыцця, людзі,
гледзячы на іх, пачынаюць задаваць пытанні: “у чым тут справа?”, “што падштурхоўвае
гэтага чалавека сягаць далей за гарызонт гэтага свету?”, адзначыў Пантыфік. Радыкальнасць
веры патрабуецца ад кожнага хрысціяніна, але ад законнікаў – асаблівым чынам, перакананы
ён. Законнікі, на яго думку, пакліканы да місійнага і прароцкага сведчання, якое павінна
быць спалучана са святасцю. “Сапраўднае прароцтва – гэта не ідэалогія, не “мода”,
але знак, якому супраціўляцца будуць – згодна з Евангеллем – як быў Езус. Езус, напрыклад,
быў знакам да супраціўлення, для рэлігійных ўладаў свайго часу: кіраўнікоў фарысеяў,
настаўнікаў закону. Але быў таксама і для іншага кшталту варыянтаў і прапановаў: эсэяў,
зэлотаў і інш.”, сказаў ён.
Францішак падзякаваў кіраўнікам манаскіх супольнасцяў
у Італіі за рашучасць, з якой жадаюць служыць людзям, і заклікаў умацоўвацца праз
пастаяннае навяртанне, малітву, адарацыю, “дзяленне са святым народам Божым, які жыве
на перыферыях гісторыі”. Неабходна вывесці сябе з цэнтру і паставіць на гэта месца
Езуса, адзначыў Папа. Толькі так, на яго думку, можа развівацца кожны харызмат. Харызмат
нельга “захоўваць як бутэльку з дысцыліраванай вадой”, але трэба з адвагай рабіць
яго плённымі, ставячы насуперак існуючай рэальнасці, культур, гісторыі.
Важным
знакам, які можа даць манаскае жыццё, на думку Папы – гэта братэрства, асабліва ва
ўмовах сённяшняй індывідуалістычнай культуры, сканцэнтраванай на суб’ектыўных правах.
Братэрства, аднак, прадугледжвае бацькоўства Бога, мацярынства Касцёла і Панны Марыі,
нагадаў Пантыфік. Уваходзіць у гэтыя адносіны, на яго думку, законнікі павінны штодзённа,
праз малітву, адарацыю і ружанец.