Кардынал Таран: нельга быць пасіўнымі перад пераследам хрысціян у Пакістане
Кардынал Жан-Луі Таран
лічыць, што нельга заставацца пасіўнымі перад абліччам пераследу хрысціян у Пакістане,
які адбываецца ў выніку распаўсюджанага фундаменталізму і выкарыстання спрэчнага закона
аб блюзнерстве. Старшыня Папскай рады па міжрэлігійным дыялогу прызнаўся, што быў
шакаваны варварскім забойствам маладой хрысціянскай сужэнскай пары, якое было здзейснена
ў правінцыі Пенджаб некалькі дзён таму, раз’юшаным натоўпам экстрэмістаў, на падставе
фальшывых абвінавачванняў у “абразе Карану”. “Рэлігія не павінна апраўдваць падобныя
злачынствы. Гэты закон пра блюзнерства існуе і ўяўляе сабою праблему: ці не павінна
ўмяшацца міжнародная супольнасць?” - задаўся пытаннем ватыканскі пурпурат. Каментуючы
прапанову аб неабходнасці ўмяшання ААН, кардынал адказаў: “Як можна заставацца пасіўнымі
перад злачынствамі, якія рэлігія абвяшчае легітымнымі?”
Кардынал Таран нагадаў,
што “пачынаючы з 1990 г., калі быў уведзены закон пра блюзнерстве, у Пакістане адбылося
каля 60 казняў”. Многія хрысціяне ўтрымліваюцца ў камерах смяротнікаў. Пры гэтым,
праблема тычыцца не толькі хрысціян, але і прадстаўнікоў іншых меншасцяў, а таксама
апанентаў існуючага ладу, якія часта становяцца ахвярамі фундаменталістаў.